E aña aki Aruba Tourism Authority a uni forsa unabes mas cu Raad van Kinderen pa asina ricibi conseho for di nos mucha nan. E biaha aki a toca turno na e alumnonan di Kudawecha Basisschool pa forma parti na e Raad van Kinderen. Raad van Kinderen ta un plataforma cu ta brinda e oportunidad na organisacionnan pa presenta un dilema cerca un grupo di mucha. Asina aki e muchanan por yuda pensa structuralmente cu organisacionnan riba diferente temanan.
A.T.A. a presenta nan dilema unda ta desea pa introduci e topico di turismo como materia den e curiculo di scol pero kier a explora cua lo ta e miho manera pa hasi esaki. E obhetivo cu A.T.A. kier logra ta pa crea un les di turismo cu ta resona cu e muchanan y alabes ta educa y informa e muchanan di e aspectonan importante di nos turismo. A.T.A. ta enfoca ariba e dilema aki pa asina nos muchanan por compronde y conoce mas tocante nos pilar economico. E meta di A.T.A. ta pa por fungi como un fuente di inspiracion pa nos muchanan, pa asina den futuro nan por sigui aporta na nos pilar economico y pa asina sigura cu e motivacion pa labora den e sector turistico tey. Cu e plan aki A.T.A. ta brinda e muchanan e oportunidad pa sugeri topiconan cu mester wordo cubri y pa comparti con segun nan informacion por yega mas efectivamente cerca hobennan.
A.T.A. na su turno ta brinda e muchanan un buki educativo referente nos turismo, y lo brinda e alumnonan di Kudawecha Basisschool feedback valioso pa asina sigura cu na final di e trayecto aki tin otro grupo di hoben mihor informa di kico ta come y bebe den nos industria di turismo. Ta gradici e docentenan tambe pa nan cooperacion y entusiasmo pa cu e proyecto aki.