Aruba Tourism Authority (A.T.A.) ta informa cu despues di dies aña trahando cu e compania Mericano, esta ‘the Concept Farm’ pa loke ta trata desaroyo di promocionnan (advertising), a yega ora pa despedi y kier gradici henter e ekipo di the Concept Farm pa un trayectorio bunita y remarcabel.
E trayectorio di e compania estableci na New York, esta the Concept Farm, a inicia na juni 2012 cu e meta pa desaroya promocionnan unico y inigualabel pa asina hiba e nomber di Aruba padilanti como un di e destinacionnan mas preferi y reconoci den Caribe.
The Concept Farm, lidera pa Sr. Gregg Wasiak, a sa di destaca den exterior desde e inicio di nan prome campaña “Return to Happiness” te na final cu nan ultimo campaña “Your Happy Place”. Hunto cu A.T.A. a gana un total di 45 premio di HSMAI Adrian Awards y un premio EFFIE, pues sigur ta algo di aplaudi.
Den nomber di Aruba Tourism Authority, no ta keda nada otro cu gradici Sr. Gregg Wasiak pa e confiansa y e trabou duro cu el a realisa pa Aruba por luci den exterior. Gregg a sa di traha cu hopi pasion, lagando su famia atras na varios ocasion pa ta presente na Aruba y asina traha riba diferente campaña extraordinario. Inclusivo durante e pandemia, Gregg y su ekipo a para cla y firme pa asina por mantene Aruba su nomber na halto pa medio di diferente promocion cu mensahenan clave di virtud. Gregg a yega Aruba como un socio y ta bay bek como un gran amigo y famia.
INICIO DI UN TRAYECTORIO NOBO
A.T.A. ta traha cu diferente agencia na Merca pa diferente trabou cu ta rekeri experticio specifico. Te cu awo ta traha cu 3 agencia, uno pa ‘PR’, uno pa desaroyo di promocion y uno pa ‘media buy/placement’, esta colocacion di e promocion den canalnan (media) debido na e forma mas bentahoso y efectivo cu ta posibel. Aña pasa a contrata e compania ‘Engie’, cu a reemplasa un otro agencia encarga cu e disciplina di ‘media buy/placement’. Actualmente ta evaluando un reemplasante pa the Concept Farm.
A.T.A. un bes mas ta gracidi the Concept Farm, pa e dies añanan di dedicacion profundo na e desaroyo di promocionnan pa Aruba, y asina ta clausura un etapa bunita, en espera di e inicio di un trayectorio nobo cu e ekipo reemplasante.