2020 a cera cu diferente cifranan di cual AAA, y AHATA entre otro ta alinea cu e cifranan di ATA. Pa Aruba Tourism Authority, a conclui cu a cera luna di December cu un adelanto di 44.5%, compara cu luna di November. A bin ta midi cada luna for di Juli 2020, for di ora cu Aruba a haci reapertura di frontera. Por mira un adelanto despues di September unda a conoce un caida mara na cantidad di casonan di Covid19 na Aruba, por a mira un continuacion di e adelanto ey, y segun ATA, uno cu a surpasa nan mesun expectativa tabata December.
Nos tabata tin un luna di November y December na unda Hulanda a cambia e codigo atrobe pa Aruba y tur pais mundialmente, dus nos no tabata tin e beneficio adicional di Hulanda como un di e tiki paisnan cu codigo Oraño. Tabata tin tambe – y por mira un continuacion tambe – cantidad di casonan positivo na Merca, y na otro paisnan incluyendo Inglatera di cual a introduci un vuelo charter na luna di December, y tambe Latino America cu a habri na December tambe. Dus por mira cu na December hopi paisnan cu nos ta ricibi bishitantenan ta confrontando olanan halto di casonan positivo cu ta sigui ta un reto pa viahe mundialmente.
Aruba a cera aña cu caida di 67% compara cu 2019, esaki kiermen un grado di recuperacion di 33% compara cu 2019. Nos a ricibi 33% di locual nos a mira durante aña anterior, y si tira un bista riba panorama mundial, organisacion mundial di turismo a proyecta 2020 cu un caida di 70% y recuperacion di 30%, pues nos ta un tiki mas ariba di esey. “Pero nos ta den conformidad cu e tendencia mundial y tambe di diferente destinonan clave pa Caribe tambe. Bo por argumenta e ora cu kisas, locual bo por a captura tambe, no por ta mucho mas cu esey mirando cu e tendencia ta cu e hendenan ta wordo stimula pa keda cas, esey ta mundialmente den diferente di nos mercadonan, pues un di e competencia mas grandi cu nos tin ta esey y tur e medidanan cu ta wordo poni pa cu esey,” segun sra. Asjoe-Croes.
E proyeccion general pa cu 2021 ta pa spera cu nos por sigui recupera mas, ta spera cu por recupera entre 45% y 60% di locual a ricibi na 2019, dus ta sigui midi compara cu 2019 cu tabata ultimo aña normal pa turismo. Ta sigui ta un aña cu hopi cambio, nos ta sigui ta mey mey di crisis, y ta hopi evidente despues di pasa e prome siman caba di 2021 cu tin hopi cambio ta sigui tuma luga. Y bisando esaki tambe, segun ATA, nos tur mester ta consciente cu nos no lo yega 100% di turismo e aña aki, pues atrobe subrayando e hecho cu e crisis ta keda vigente.
Defacto, si mira e proyeccionnan cu tin, un 45% di recuperacion kiermen mas o menos un 500 mil bishitante pa 2021, 60% di recuperacion lo ta rond di 650 mil bishitante, y si bay bek den historia, nos ta papiando di cifranan cu nos a conoce na comienso di aña 1990, y mediante di aña 1990. “Dus ban ta consciente cu e ta bay keda un proceso gradual.”