ATA cu reunionnan clave pa e mercado di Norte America delineando ahustacion pa 2019 y desaroyando plannan pa 2020

E siman cu a pasa a tuma e luga e Data Summit 2019 pa e continente di Norte America. Esaki ta un encuentro importante pa Oficina di Turismo Aruba (A.T.A.) ya cu ta analisa e estadisticanan di e mercado turistico di Norte America. Di e forma aki ta determina ahustacionnan necesario pa loke ta maneho y e manera di haci mercado pa nos isla
como destino. E Data Summit pa cu Norte America ta un evento cu ta tuma luga un bes pa aña. Di Aruba Tourism Authority, CEO Ronella Tjin Asjoe-Croes, CMO Sanju Luidens-Daryanani, Gerente di Strategia, Investigacion y Planificacion Melanie Evans-Kelly y Specialista Investigacion di Dato Kareline van der Linden, a biaha pa New York pa e acontecimento aki. Ademas tawata tin participacion di A.T.A. di Norte America, Director Ed Malone, hunto cu e ekipo di A.T.A. Norte America, como tambe tur e agencianan cu ta encarga cu ‘advertising, PR’ regional pa e continente aki cu ta Ansira, Concept Farm, USIM y Zeno Group. Data Summit Topiconan riba agenda tawata entre otro e resultadonan di aña 2018 cu ta papia di e nivel di satisfaccion di esnan cu ta bishita nos destinacion for di Norte America. E nivel di satisfaccion ta wordo midi abase di un escala di 10 punto, y for di e encuesta por saca afo e satisfaccion general di e biahe pa Aruba, e probabilidad di bolbe bishita y e probabilidad di
recomenda Aruba na amigo- y famianan. Por bisa cu 84% di esnan cu ta bishita ta satisfecho cu nan biahe pa Aruba, 79% di esnan cu ta bishita sigur lo recomenda Aruba na amigo- y famianan, y 64% di bishitante di Norte America sigur lo bolbe Aruba bek dentro di cinco aña.
Ademas a combersa di ‘Millenials’ y ‘Kico e bishitantenan ta haci durante nan estadia na nos isla’. E mercado Norte America ta trece un porcentage relativamente grandi di bishitante cu ta wordo categorisa como ‘Millenials’. Tambe a para keto riba e actividadnan cu ta ‘score’ bon y menos bon bou di esnan cu ta bishita. Durante e reunion a specifica tocante kico ta e tendencia pa loke ta trata e profile di bishitante cu Aruba ta desea ta atrae. Tambe a repasa extensamente e bishitante afluente y patronchi di gasto di nos bishitantenan. Por mira con e bishitante cu ta ripiti ta sigui gasta mas na nos isla, y por mira tambe e conexion entre esnan cu entrada anual mas halto y con nan ta gasta mas cu otro. E strategia di diversificacion den Merca tambe ta sigui mustra adelanto entre otro cu introduccion di vuelo di Dallas na december 2018. Enfoke pa cu 2019 pa e Mercado di Norte America ta pa crece cu 3.9%. Ta bon pa menciona cu pa aña 2018, Norte America a trece un total di 792.904 bishitante pa nos isla, cual ta representa 73.3% di e total di bishitante pa Aruba.

Comments

comments