Diaranson anochi den un rato ameno e team di Astros 60+ bou di sponsorship di Arends Inspection a bautisa nan uniform nobo. Giovanni Gomez a percura pa e team di Astros SBC liga 60+ bira realidad. Despues cu e bautismo a tuma lugar, a reparti esaki den nan miembronan. Astros Arends Construction lo wordo dirigi pa sr Ruthsel Martina y asisti pa Sr. Humphrey Mohamed.
Como madrina a fungi e dinamica hobencita Sheqayli “ Chiki” Ascencion. Sheqayli ta gusta lesa y educa su mes. Algun di su logronan den su bida hoben aki ta; presenta como MC na edad di 8 aña, reina infantil di Aruba su Carnaval na 2014. E la representa Aruba den e “Football for Friendship” na Rusia y a sa di bay cu e titulo di “Young Journalist” unda 211 pais a participa y asina bira “Gazprom Youth Ambassador” desde 2018. Sheqayli “Chiki ta e cara tras di e proyecto “Parke Marino” y den e fin di siman tras di lomba a fungi como MC den e festival Infantil “Himno y Bandera”.
Cu esaki Astros Arends Construction SBC liga 60+ ta cla pa enfrenta tur reto nan dilanti. Tur fanaticada di bon softball ta wordo invita pa asina bin apoya nan na e prome wega cu lo tuma luga diadomingo 24 di maart 2019 na Aruba Juniors pa 11or di mainta.
—-BRING IT ON—–