ASTEC ta anuncio cu desde dialuna dia 3 di Mei 2021, e orario di servicio na Main Gate na waf di Barcadera lo cambio y adapta di 7:30 am – 4:30 pm non stop di Dialuna pa Diabierna.
Sr. Mike de l’Isle, Gerente / CEO di ASTEC N.V. ta comenta: “e expansion di nos orarionan di servicio na Main Gate di nos Waf na Barcadera ta debi na e necesidadnan di nos clientenan pa mas flexibilidad pa atende cu asuntonan di containers. Nos ta masha contento cu e cooperacion di Duana y tur empleado envolvi pa duna e servicio durante e orarionan extendi pa atende cu containers na Main Gate y nos ta mira padilanti pa un transicion exitoso cu tur partido envolvi”.
Sr. Roderick Croes, Director di Duana ta relata “den e cuadro di facilita comercio, Duana ta haci uzo di e oportunidad pa, conhuntamente cu ASTEC, haci e cambio di orario di servicio posibel na Main Gate di Waf di Carga na Barcadera. Cu e expansion di orarionan di servicio, e clientenan ta haya mas espacio pa saca nan container cu carga y asina comunidad Aruba por tin productonan mas lihe na nan disposicion”.
