QUITO/LONDON – WikiLeaks a anuncia cu Julian Assange lo entrega un demanda contra di gobierno di Ecuador pa viola su derecho y libertad fundamental.
P’aworaki, e portal di filtracionnan no a duna mas detaye ariba esaki.
E siman aki, diplomaticonan Ecuatoriano a elabora un protocol special pa detaya e condicionnan cu tin cu wordo “strictamente cumpli” door di Assange, cu ta permanece den e Embahada di Ecuador na London, como asilado diplomatico. E documento ta pretende “di facilita den forma ordena y sigur” e procedimento di e bishitanan na e fundado di WikiLeaks como cu tambe su comunicacionnan y asistencia medico.
Autoridadnan Ecuatoriano a dicidi di dun’e acceso na wifi di e Embahada pa e subi internet y realisa yamadanan telefonico for di su mesun computer y celular. Na mes momento, e protocol nobo aki ta prohibi Assange di “realisa actividadnan cu por wordo considera como politico y di interferencia interno di otro estadonan of cu por perhudica e bon relacion di Ecuador cu otro estado, sin importa e manera uza pa ehecuta e actividadnan aki”.
Tambe Assange lo mester encarga su mes di e “bienestar, alimentacion y cuidado adecua” di su pushi. “Si e no duna su mascota e cuidado debido, e hefe di Mision lo pidi Sr. Assange pa entrega su mascota na un otro persona of un animal shelter pafo di e Mision Diplomatico”, e documento a bisa.