Asociacion di Panaderonan di Aruba lo sinta cu gobierno diahuebs mainta pa cu e tema di 6 % cu ta na caminda.
Esaki ta en bista di cu pan ta cay bou di e canasta basico, pero na final e costo pa traha pan tambe lo subi despues di un di juli. Informacion cu nos ta dispone di dje ta bisa cu e BBO/BAZV di 3.5 % caba tabata un peso pisa pa e panaderonan, pero pa haci esaki bira 6 % e ta bira mas pisa ainda pa e panaderonan.
Den pasado caba na diferente biaha e asociacion di panaderonan a pidi pa bin cu un aumento pa pan, pero no a haya e atencion di gobiernonan anterior. Nan ta spera cu durante e reunion di diahuebs mainta, e minister di Finanzas, mr. Xiomara Ruiz- Maduro, por duna atencion na e topico aki, ya cu e ta uno di sumo importancia pa e panaderonan.
Masnoticia lo sigui e desaroyonan di cerca.