E cabesante y maestronan di Prinses Amalia Scol Preparatorio y Aruba Tourism Authority tabatin un secreto grandi bon scondi pa e alumnonan di e scol y tabata manera un explosion di alegria na e scol ora cu nan a haya e bishita inespera mainta tempran di tripulantenan di Coral Princess y Santa Claus.
Santa Claus y su ayudantenan a cana drenta e scol cu nan mannan yen; e muchanan a topa nan cu sonrisanan grandi y ainda mas alegria ora cu nan a wak e cantidad di regalo cu nan a trece. E gerente encarga cu recursonan humano pa Coral Princess a splica cu esaki ta su prome bishita na Aruba y el a gosa di e reaccion di e muchanan. El a sigui bisa cu p’e, e Holiday Gift Project di Florida Caribbean Cruise Association (FCCA) ta un experiencia fantastico. Tabata fabuloso pa wak e sonrisanan y un placer pa yega na e scol, entrega e regalonan, y mas ainda pa disfruta y comparti un momento unico den e comunidad di Aruba.
Ernest Giel di Aruba Tourism Authority pa e di 12 aña consecutivo a percura pa tur detaye cu ta haci di e proyecto aki uno asina exitoso y a hiba palabra yamando danki na e tripulantenan di Coral Prinsess. Ernest ta splica cu el a tuma encargo di e coordinacion local di e proyecto 12 aña pasa, pero en realidad esaki ta e di 15 evento anual na Aruba cu FCCA ta percura pa tuma luga. E proyecto, en general, ta existi mundialmente pa 20 aña caba.
El a agrega cu tur isla cu e cruceronan, cu ta forma parti di FCCA, ta bishita, conoce e Holiday Gift Project y esaki ta un di e gestonan di parti di FCCA pa expresa nan gratitud na e comunidadnan cu ta brinda hospitalidad na nan huespednan y ta coopera cu tur e liñanan crucero cu ta miembro. Na cada waf e tripulacion di diferente barco ta entrega mas cu 200 regalo hunto cu Santa Claus durante di un bishita na un instancia, organisacion of school.
Pa algun aña caba, nan ta bishitando nos isla cu e proyecto aki, y e aña aki tabata turno pa Prinses Amalia Scol Preparatorio. Cada aña ta scoge un otro instancia, fundacion of un scol, y tur scol, -un pa un- lo haya nan turno, asina Ernest Giel a agrega.
E cabesante di Prinses Amalia Scol Preparatorio, Roelien Kock, a bisa cu ta prome biaha cu Prinses Amalia Scol Preparatorio ta ricibi un bishita asina y nan a dicidi tambe como team pa mantene e evento un secreto pa e muchanan. “Mi mes tampoco a spera asina hopi cos bunita,” el a expresa.
E team y e alumnonan di e scol, cu a ricibi e sorpresa cu masha entusiasmo, a keda sumamente contento cu e gesto di FCCA, A.T.A. y Coral Princess. Cabesante di e scol a finalisa bisando cu e tabata un experiencia inolvidabel pa e muchanan, pero tambe a haci un impresion grandi riba e team completo di e scol.