Asociacion di Auto den area di crucero contento cu e cambionan na waf
Recientemente a introduci den e area di waf crucero, algun borchi cu lo indica e orarionan di servicio, como tambe ken mag di para den e areanan aki. Esaki sigur ta trece un poco mas di structura den e fluho di e trahadonan den e area di turismo.
Sr. Curt Nedd, di e Asociacion di Auto ta contento cu e cambionan den area di waf di Playa, y tambe e cambionan cu Sr. Lito Kock, di polis di Oranjestad, a trece. Sr. Nedd ta amplia.
E trafico cu ta circula banda di waf pa hopi tempo tabata stroba e tourbusnan di traha, causa door di desordo y molester. Sr. Curt Ned a expresa tambe cu e cambio aki tabata tin mester di hopi tempo caba caminda cu awor aki lo cuminsa traha na un otro nivel den un forma organiza y esaki lo ta hopi bon unda lo bay tin un otro ambiente di trabou, mas cordial tambe entre coleganan.
Ya caba e asociacion di bus cu ta duna servicio na turista lo ta conforma pa 21 miembro caba den nan club y awo cu e mehoracion aki cu a wordo realisa sigur e lo keda crece y lo bay haya mas hende interesa pa drenta den e organisacion aki, segun Sr. Curt Nedd.