Recientemente tabata tin un board meeting di WBSC na Monterrey Mexico. World Baseball and Softball Confederation a reuni cu su ehecutivonan di tur 5 continente tanto di baseball como softball. Topiconan mas importante tabata sistema di clasificacion pa weganan Olimpico 2020 cual proposicion lo wordo entrega na IOC (International Olympic Committee) pa un aprobacion final. Alabes a trata hopi structuracion y modernisacion di e joint venture ISF y IBAF cual awe ta conoci bou di un solo organisacion WBSC. Mey mey di tur esaki nos representante di Aruba Endy Croes no a perde e oportunidad di haci algun lobby work cerca e gigantenan den e deporte di bala. Atrabes di algun bon amigo den top di Softball USA Craig Cress CEO y Executive Director di Softball USA y tambe ET Colvin kendenan tabata presente na dicho board meeting a logra 2 cupo pa Aruba pa un curso di umpire cu lo tuma luga den luna di November na Merca. Aruba lo mester cubri solamente e ticketnan y Softball USA lo cubri lo demas hasta Softball USA lo paga e suma di inscripcion y demas gastonan involvi pa Aruba. Aruba Softball Bond su directiva trahando duro tanto como representante den directivanan internacional pero tambe ta purba percura pa semper Aruba por saca algun acuerdo faborabel pa e desaroyo di su softball. Aruba Softball Bond, cumpliendo cu e liña di maneho di WBSC, ta haci un suplica di ta buscando hobennan rond 30 aña cu tin interes pa bira un umpire y den futuro un umpire internacional pa tuma contacto cu Zuleyka Willems na 7498459 pa mas informacion. Softball den pleno desaroyo.