Parokia Birgen di Fatima na Dakota ta organizando un Asamblea Sinodal pa su parokianonan y tur persona cu ta biba den e barionan cu ta pertenece na e Parokia di Dakota.
Kico ta un Sinodo? Un Sinodo ta un asamblea di obisponan y tin como tarea pa yuda Papa den gobernacion di Iglesia Universal dunando Papa conseho.
Pa prome biaha den historia di Iglesia Catolico, un Sinodo Comunitario pa e pueblo di Dios ta wordo organisa na henter mundo. Papa Francisco kier skucha nos preocupacionnan y ta pidi pa contesta algun pregunta di nos bida diario.
Si abo ta haya cu Iglesia Catolico tin cosnan cu por ta diferente, esaki ta bo oportunidad pa trece bo preocupacionnan y sugerencianan dilanti.
Tur e preocupacion, sugerencia y contestanan treci dilanti lo wordo compila y manda pa Obispo Luis A. Secco cu na su turno lo manda esakinan pa e Conferencia di Obisponan di Antiyas.
Pastoor Jozef Pelc y Diacono Michael Nicolaas ta invita parokianonan pa participa na e Asamblea Sinodal Parokial cu lo tuma luga diasabra dia 29 di januari di 9’or di mainta pa 1’or di merdia den misa Birgen di Fatima na Dakota. Registracion lo cuminsa pa 8’or y mey di mainta.
Pa motibonan organisatorio ta pidi parokianonan pa inscribi pa participa na e Asamblea no mas tarda cu dia 26 di januari via celular # 5612524 – # 5921858 – # 5930891.
Pa cubri gastonanan relaciona cu e Asamblea Sinodal lo pasa un collect durante di e Asamblea.
Nos ta conta cu boso participacion!