Temporada di Fin di Aña ta acercando y Arutram ta prepara y ta dispuesto pa core e oranan necesario te oranan desea. Tambe nan tin bon contacto cu e organisacion di actividad den caya, vooral cu Sra. Lindey Croes. Sr. Pierre Croes, director interino di Arutram ta splica.
Arutram tin un tram full dorna na luz cu nan por core anochi, dun’e un tiki ambiente di fin di aña di Pasco y Aña Nobo. Tambe nan ta willing pa haci cierto charternan pa gruponan cu kier haci algo di fin di aña cu Arutram.
Esey lo cuminsa for di aworaki caba y nan ta prepara, nan personal ta full getrain y cla pa fin di aña, y vooral ariba e parti di siguridad ta e parti mas importante, pa salvaguardia e siguridad di e pasaheronan, unda cu lo tin personal cu lo yuda dirigi e trafico.
Pa loke ta e boom banda di Ex La Linda, cu no ta den funcion mas, pero Sr. Croes a bisa di lo coordina esaki cu DOW y polis pa pone e boom aki den funcion bek pa asina e trafico su fluho por sigui.
Aworaki tin 2 tram para pa mantencion di siguridad y ta wardando ariba piesanan yega for di exterior, pa asina tur e tramnan por ta den circulacion atrobe.
Pa loke ta e orarionan di fin di aña, Sr. Croes a bisa cu esey ta keda pendiente sperando ariba decision di kico gobierno tin pensa di haci pa cu e orarionan di fin di aña. Aworaki ta coriendo for di 9 or di mainta te cu 6 or y 30 di atardi, basa ariba e orario di tiendanan den Caya Grandi.
Por ultimo, Sr. Pierre Croes, director interino di Arutram a bisa cu nan ta dispuesto pa extende nan orario, den caso cu esaki ta necesario.