Diabierna merdia, Arutram a sorprende Fundacion pa Nos Comunidad cu un bunita donacion monetario. Alvin Cornett, empleado na Arutram, ta bisa cu ora e tabata sinta cu algun empleadonan el a trece dilanti cu lo ta bunita pa haci un gesto na un fundacion pa e dianan di fiesta aki.
Cornett ta bisa cu e proceso a cuminsa cana anto tur dia e tabata tras di su coleganan pa percura pa haci esaki posibel. “Nos tambe t’ey pa duna ayudo na hende cu ta den necesidad, esaki ta un muestra cu tin mas compania cu ta haci gestonan asina, anto no cu nos ta un compania chikito kiermen nos no por, tur compania por,” segun sr. Cornett. Tur empleado a cera un suma, y Arutram mes a aporta un poco mas tambe riba e donacion monetario aki.
Veronica Avila, trahador social na Fundacion pa Nos Comunidad ta bisa cu semper nan ta haya tanto compania of hende particular cu ta sinti e bondad di yuda un famia, anto asina ta hayando diferente ayudo cu comestibel of paña.
“Mi ta kere e meta mas grandi ta pa comunidad ta uni, si bo ta bendiciona cu ainda bo tin dak, cu bo tin cuminda, trabao, pa nos corda riba esunnan menos afortuna cu riba e temporada aki e ta un tiki mas dificil como famia,” segun sra. Avila, concluyendo cu su bo tin e oportunidad pa yuda, haci esaki con cu bo por pa haci un famia contento e temporada aki.