Sr. Diego de Cuba, lider di Sindicato STA ta lamenta cu diabierna a haya un rapport di Arubus cu no ta un rapport cu ta bisa con ta bay haci cu e problema di e busnan cu ta den mal condicion.
Mayoria di busnan ta daña y atrobe por a lesa den noticianan con un bus tabata na candela. E chauffeur a actua rapido y a evacua e bus. Esaki ta otro prueba atrobe cu ta duna e trahadonan principalmente y tambe sindicato rason, cu e busnan ta den mal estado y cu e gerencia no ta haci lo necesario pa cu e situacion aki.
Segun Sr. de Cuba, e por bay den detaye tocante placa cu ta wordo malgasta den Arubus, cual no ta e intencion. E intencion ta pa e empleadonan di Arubus, por core den un bus, cu ta apto pa core ariba caminda. E bus cu ta gekeur y sigur, cu e rijvergunning na ordo. Y tambe e busnan cu tin airco, cu e airco ta trahando. Un situacion cu mester ta optimal.
Un biaha mas ta pone enfasis cu ta trata di bida di hende, di tur edad, hendenan cu ta bay trabao y tambe ta trata di studiantenan. Dus e clientela di Arubus ta varia pero e ta fastioso pa subi un bus anto sin sa si ta yega e destino henter of ta yega kima.
Den e protocol cu a firma, a keda palabra cu dia 10 di Maart 2017 Arubus lo a bin cu un plan. Pero e plan ta cos di hari. Como director di un compania, pa bo bin cu un plan di tres regel, esey ta un payasada. Un plan di recuperacion, con ta bay drecha e busnan, mester ta hopi mas amplio. E busnan di Arubus ta den un situacion deplorabel. E tirenan, e sistema di brake. Kico ta pasando na Arubus? Mas di lamenta ta, cu Sindicato ta manda carta pa Minister Mike de Meza, pa trata e asunto aki y ta un berguensa cu te ainda no a haya ni un contesta.
Sr. de Cuba ta sigui bisa cu lamentablemente e minister no ta duna oido na nan peticion. Esaki ta un proceso cu sindicato ta haya hopi di lamenta. E situacion deplorabel, desastroso y mal maneho cu tin den Arubus, sindicato ta haya hopi lamentabel.
Despues cu reuni cu e shopstewardnan y reuni cu e miembronan di Arubus, nan lo bay para te na Bestuurskantoor. Si sindicato no ta haya oido, nan lo cana e caminda cu nan mester cana. Via tur e canalnan oficial y no oficial a manda carta pa Minister. SIndicato kier un contesta y pa nan por trata na yega na solucion. Ta hopi tata y mama di famia ta depende di e compania Arubus. No e trahadonan directamente, pero hopi otro cu ta haci uzo di Arubus pa nan yega nan destino.
Por ultimo Sr. Diego de Cuba, lider di STA a bisa cu si sindicato ta confirma cu e maneho di Arubus, ta malo, ta pasobra cu e ta malo.