E luna aki tin otro aspecto di Arubig ta drenta na vigor cu ta permiti reconoci diplomanan di algun Universidad Latino Americano.
Esaki a wordo logra despues di un trabou realisa door di “Commissie AruBIG” institui door di Minister di Salubridad Publico Dangui Oduber. Hopi hoben di Aruba a studia den region y na final nan diploma no ta reconoci pa autoridadnan di Aruba. P’esey e mandatario a bisa “nos lo amplia nos registracion pa esnan trahando riba e tereno di salud na un manera responsabel dunando reconocimento na nos yiunan di tera cu a studia den region. E tabata un trayecto largo cu hopi discusion pero unda tin un vision y determinacion cu profesionalnan pa duna e miho conseho Aruba ta logra. Despues di 3 aña di trabao intensivo awe Aruba ta conta cu un logro historico cual ta e introduccion di Landsbesluiten cu ta regla organonan di acreditation y criterianan di estudio cu ta reconoce estudionan den medicina den region.”
E mandatario a splica cu e decretonan gubernamental ta regla cu banda di e registro di BIG di Hulanda, Aruba ta reconoce specialismonan den medicina acredita pa e siguiente organonan manera Sistema Nacional de Acreditacion de la Educacion Superior (SINAES) na Costa Rica, Consejo Nacional de Acreditacion (CNA) na Colombia, Education Commission for Foreign Medical Graduates (ECFMG) na Merca y Medical Council of Canada (MCC) na Canada.
E otro Landsbesluit cu lo drenta na vigor 15 di mei 2021 ta regla e criterianan di estudio basa ariba e principio cual ta yega cerca di e sistema di educacion di Canada y Hulanda y ta traha cu programanan di intercambio.
Despues di e sondeo den region e siguiente Universidadnan ta cumpli cu e criterianan stipula: Universidad de Costa Rica (UCR),Universidad de Ciencias Medicas (UCIMED) y Universidad Latina de Costa Rica. Pa Colombia e siguiente universidadnan ta cumpli cu e criteria cualnan ta Universidad El Bosque y Pontificia Universidad Javariana.
E profesionnan den sector di medicina cu dentro di 3 luna cuminsa registra ta dokter, apotheker, partera y fisiotherapeut conforme e Landsbesluiten aki. Pa loke ta trata e specialismo di djentista esaki tambe ta canando e proceso pa wordo introduci. E ampliacion aki lo duna mas oportunidad y crea mas resiliencia den sector di salud publico, segun e mandatario a splica.
Di e forma aki gobierno di Aruba ta cumpli cu e vision cu ta trece bek e yiunan di tera y profesionalnan den sector di medicina y cuido pa asina yuda reenforsa salubridad publico.
Ademas e ampliacion aki lo crea mas oportunidad na e profesionalnan pa specialisa aki na Aruba mes por medio di convenionan cu institutonan reconoci manera NSPOH.
E mandatario encarga cu Salubridad Publico Dangui Oduber na final ta felicita tur e hobennan di Aruba cu a studia den region, y na e universidadnan menciona, cu awor lo por traha na Aruba.