Nos Arubiano nan lubida y bandona, aki nos ta referi na nos yiunan di tera cu for di 1986 ta pega na Corsou door di nos mesun sistema gubernamental di Aruba. For di deliberacion nan prome cu 1986, nos dirigentenan tabata na altura cu pa e grupo di mas of menos 30 Arubiano, e tempo ey mucha, no tin luga pa nan na Aruba y nan mester a keda Corsou. Segun candidato riba lista di POR, Ronny Maduro, desde e tempo ey ningun dirigente a bira wak atras pa nos yiunan di tera lubida y bandona na Corsou. E unico cos cu ta haci ta, paga pa tene nan interna. Esaki sin controla nan estado di salud ni tampoco nan estado di vivienda. Pues nan calidad di bida ta ignora pa mas cu 31 aña caba. Ta tristo pa bisa cu hopi ta cu limitacion pa mobilisa, pero ta bon na altura kico tur ta pasa rond di nan. E ora por conclui cu emocionalmente nan a sufri hopi despues di pasa decadanan leu di nan famia. E dolor mas grandi ta cu for di basta aña caba nan kier bolbe nan pais natal pero niun departamento ni gobernante a dunanan balor of atencion. Nan no a comete ningun delito, nan tin un limitacion y e Arubianonan aki merece pa ta parti di nos comunidad cerca di nan famia y sernan keri. Despues di a tuma nota cu tin un lista largo di espera pa persona cu limitacion na Aruba, con lo para anto cu esun nan cu ta residencia na Corsou cu ta bao di encargo financiero y responsabilidad di Pais Aruba? Un capitaal grandi ta pasa pa decadanan caba den presupuesto di Pais Aruba destina pa Corsou. Dicon no a haci un esfurso, un investigacion pa averigua ki posibilidad tin pa traha un instancia cu lo por conduci pa trece bek nos Arubiano lubida y bandona na Corsou. Pais Aruba tin un responsabilidad pa cumpli cu cada Arubiano di Pais Aruba, sin destincion di rasa, religion ni tampoco limitacion. Pa hopi aña a lubidanan y esnan cu sa a prefera di ignoranan, pero ta ora pa defende nan derecho. Ami, Ronny Maduro ta para contra e inhusticia pa nos mucha y adultonan cu limitacion. Nan merece un miho calidad di bida y Aruba POR brinda nan esaki.