Hopi sigur lo bisa e siguiente palabranan aki: “Porfin!!!!”. E ta oficial Diahuebs ultimo 31 di October, 2019 na oficina di Notaris Ralph Yarzagaray a tuma luga e firmamento di e acte di Arubanse Bond Van Motorsports (ABM). Como presidente a wordo nombra Richard Every, Secretaris Jason Fun, Penning Meester Oliver Vieira, Bestuurlid Jose Werleman, Bestuurlid Gregory Tromp. Un Pabien na e mundo di deporte di motor y tur clase di exito y forza na e directiva. Esaki ta nifica cu awor oficialmente tin un federacion cu mester regular e diferente deportenan cu tin di haber di motor p’asina esakinan por ta mas organiza. Sigur pa loke ta e seccion di Drag Racing, e doñonan y drivernan di auto y motorcycle ta sumamente contento pasobra ta basta tempo nan vehiculonan tin para sin por mishi cu e beton, asfalt y rubber di pista di International Raceway Park Palo Marga. Sinembargo, mester bisa cu ta awo e trabao duro ta bai cuminza pa pone e pista di Drag operacional bek y sin lubida tambe e otro construccionnan di pistanan di motorcross y karting cu mester bini tambe den e facilidadnan y tambe esun di Drifting y Fever. Nos kier a desea e federacionnan aki y su directiva tur clase di exito y ban awo pa tende e motornan ronca duro duro.