DEN HAAG – Durante di un serie di encuentronan Arubahuis a presenta e team di mentornan nobo na e grupo di studiantenan cu ta den nan prome aña. Alabes a tuma despedida di e mentornan cu tabata encarga cu e regionnan. Na e ocacion aki e studiantenan pa e region di Groningen y Leeuwarden a cera conoci cu nan mentor nobo Donna van Heukelem-Kock.
Den e caso di Arnhem, Nijmegen y Wageningen e mentor nobo ta Yuraima Henriquez-Rodulfo.
E studiantenan den e region di Utrecht tambe a cera conoci cu nan mentor nobo den persona di Omar Besaril. Finalmente dos mentor nobo pa e region di Den Haag, Delft y Leiden a keda introduci kende nan ta Solange Quandus y Shahaira Brokke.
Tur e mentornan nobo a tene un presentacion cortico di nan mes; ki aña nan a bin studia na Hulanda, ki tipo di trabao nan tin y algun mas informacion personal. Tambe e mentornan a duna informacion con pa contact nan y cu pronto nan lo haci bishitanan na unda e studiantenan ta biba pa mira con cos ta bayendo pa cu vivienda y otro aspectonan pa cu e studio of bida na cu Hulanda.
Durante e diferente encuentronan Minister Plenipotenciario Guillfred Besaril a enfatisa e importancia di e guia di e mentornan. E mandatario a remarca cu e informacion y e preparacion di e studiantenan prome cu nan bin Hulanda mester ta mihor. Pesey segun sr. Besaril Arubahuis a tuma un paso mas proactivo door di tene anochinan di informacion na Aruba. ‘November benidero Arubahuis lo ta na e College Fair pa duna un presentacion riba studia na Hulanda. Nos ta conciente cu nos hobennan mester ta mas mihor informa y prepara pa asina ora cu nan yega Hulanda nan tin menos dolor di cabes y por concentra riba cuminsa cu nan estudio.’ Den esaki e mandatario a menciona tambe cu Arubahuis ta preparando un proyecto unda ta envolvi e studiantenan pa for di nan mesun experencia manda e mensahe na tur hobennan na Aruba cu ta pensa pa bin studia na Hulanda. Besaril: ‘Nos ta pensa pa acerca rond di Hulanda studiantenan cu ta dispuesto pa haci esaki, sea den forma di video of mas frecuente como vlogger. Nos sa cu hopi di nos hobennan ta riba e red di medionan social. Nos ta kere tambe cu e mensahe por wordo capta mas liher ora nan tende esaki di studiantenan cu ya caba ta bibando aki bou.’