DEN HAAG – Minister Plenipotenciario Sr. Guillfred Besaril a tene un reunion cu Korpchef di Polis, Sr. Andrew Hoo. Tambe presente tabata Sra. Nuris Dabian, coordinador di e departamento di Asunto Social na Arubahuis. Mescos cu tabata e reunion cu PG Van Dam akinan Minister Besaril a bolbe menciona e rol cu Arubahuis por hunga den e Social Crisis Plan.
Korpchef Ho a indica cu hopi biaha polis ta cana tras di e echonan; na ora cu polis ta envolvi ya caba e problema a escala caba. Mester concentra riba e raiz di e problema y esaki ta unda cu e organisacionnan social mester duna nan contribucion. Sr. Hoo a menciona cu Departamento di Asuntonan Social a indica cu tin 200 caso di e categoria “red flag”, dus hopi urgente mes.
Tambe Sr. Hoo a haci mencion di hopi casonan na Aruba cu personanan cu problemanan
psicologico.
Minister Besaril a bisa cu na Hulanda tambe tin hopi casonan asina bou di nos hendenan. Segun e mandatario bo mester mira Arubahuis como un “verlengstuk” di Aruba; personanan cu tin problemanan social ta bay Hulanda. ‘Pero unabes cu nan ta na madre patria nan ta enfrenta
problema grandi cu diferente gemeente y instancianan na Hulanda. Nan ta acerca Arubahuis pa ayudo y semper nos ta dispuesto pa yuda unda nos por. P’esey ta importante pa Arubahuis ta na altura di e situacion na Aruba pa asina anticipa riba situacionnan cu nos por haya nos confronta cun’e,’ asina Minister Besaril a bisa.
Un aspecto hopi importante cu a bin padilanti durante e combersacion ta e necesidad di
profesional. Riba tur tereno mester di mas personal; por ehempel ayudo na victimanan
(slachtofferhulp). Mester cuminsa identifica kende nos tin como nos mesun hendenan. A papia riba kisas ta bon pa forma un grupo di trabao pa bin cu sugerencianan pa yega na protocol di cooperacion entre Aruba y Hulanda. Minister Besaril a ilustra un otro aspecto cu por yuda. Tin un trend na Hulanda cu hopi hende ta tuma un aña sabatical di nan trabao. Kisas ta bon pa mira si por encurasha e profesionalnan aki pa bin Aruba y comparti nan experticio cu nos.
Minister Besaril a gradici Korpscef Hoo pa e reunion y a bisa e korpschef cu e por conta cu
Arubahuis pa cualkier sosten cu KPA mester dje pa nan trabao na e bienestar social di nos
comunidad.
Potret ta cortesia di Cas di Aruba