Na december ultimo De Haagse Hogeschool a acerca Arubahuis pa forma parti di un iniciativa complementamente nobo. Ta trata aki di e desaroyo di un minor Koninkrijkszaken for di e faculteit di rechten, bestuurskunde y integrale veiligheid na e dicho hogeschool. Minister Besaril hunto cu e team di Arubahuis tabata sumamente positivo y entusiasma cu e iniciativa aki cu ta wordo considera e prome den su forma y riba e topico aki den enseñansa superior na Hulanda. Despues di varios luna di preparacion y deliberacion a start oficialmente cu e minor Koninkrijkszaken na comienso di september ultimo cu un grupo di 34 studiante. Hunto cu Haagse Hogeschool y Arubahuis e minor Koninkrijkszaken ta conta cu colaboracion di Curaçaohuis, Sint Maarten House, Ministerie van Binnenlandse Zaken en Koninkrijksrelaties como tambe Ministerie van Onderwijs, Cultuur en Wetenschap di Hulanda. Banda di e partnernan menciona e minor ta conta cu colaboracion di varios orador invita specialisa riba diferente area relaciona cu reino Hulandes. Como tarea principal cada partner a keda encarga cu e formulacion di un tarea autentico pa e studiantenan cu a scoge pa e minor. Despues di varios deliberacion Aruba a scoge finalmente pa e topico di imigracion y asilo den e contexto di e situacion actual na Venezuela. Un topico hopi relevante y actual cu ta toca cada un di e tres areanan di specialisacion di e studiantenan. Pa e formulacion di e tarea aki Arubahuis a traha di cerca cu coleganan di Departamento di Integracion, Maneho y Admicion di Stranhero (DIMAS) y Ministerio di Husticia, Seguridad y Integracion di Aruba.
E programa di e minor a inclui un bishita na cada instancia cu ta fungi como partner di e minor pa asina por duna informacion general y presenta e tarea principal na e studiantenan. Dia 12 di september ultimo a toca turno na Arubahuis pa ricibi e studiantenan y docentenan di Haagse Hogeschool unda cu a percura pa un programa hopi varia. E bishita a inclui varios presentacion di coleganan ambos na Hulanda como na Aruba. Minister Besaril a inicia e dia cu un introduccion unda cu e mandatario a elabora riba e desaroyonan crucial den historia di Aruba den reino. Directeur di Arubahuis a sigui cu un presentacion di e rol y tareanan principal di Arubahuis como representacion di Aruba na Hulanda. Sr. Eddy Paris como representante di Aruba na Union Europeo tambe a duna un presentacion di e relacion di Aruba riba nivel di Union Europeo y e ultimo desaroyonan riba e tereno aki. Afdeling Juridische Zaken y afdeling Onderwijszaken di Arubahuis a sigui cada un cu un presentacion unda cu a elabora riba nan tareanan y riba e topiconan actual na nivel di reino. sr. Tirso Tromp di ATA Europe tambe a duna un contribucion e mainta aki unda cu a elabora riba diferente aspecto di nos industria principal di turismo. E programa a conclui cu e presentacion di e topico imigracion y asilo y introduccion di e tarea formula door di Aruba. Ministerio di Husticia di Aruba den representacion di sr. Milko Baiz a manda un mensahe pa e studiantenan den nomber di Minister Bikker unda cu a acentua e importancia di e topico presenta pa Aruba. Sra. Jacqueline Harewoord di DIMAS a conclui e mainta cu un video unda cu a presenta e topico y a elabora riba e tarea pa e studiantenan.
E studiantenan tin awor tin 2 luna di tempo pa profundisa nan mes den e topico di cada partner y na final presenta nan conclusion y recomendacionnan na cada pais. E presentacion final ta plania pa comienso di november y lo conta cu presencia di diferente mandatario y e representante di e instancianan menciona.
Minister Besaril y Arubahuis ta aplaudi e iniciativa aki y ta contento di por forma parti di e minor Koninkrijkszaken di De Haagse Hogeschool. Un palabra di danki ta bai pa coleganan di DIMAS y Ministerio di Husticia di Aruba pa tur e esfuerso y pa e bon cooperacion ricibi.
Nota pa redacion: Potretnan ta cortesia di Cas di Aruba.