Recientemente Arubahuis a ricibi un grupo di alumno y docente di International School of Aruba (ISA) cu tabata na Hulanda pa un viahe di estudio y orientacion. E grupo a bin Hulanda pa bishita diferente instituto pa enseñansa superior y pa orienta riba opcionnan di estu-dio na Hulanda y Europa. E departamento di enseñansa di Arubahuis a percura pa e recepcion y pa un programa varia cu informacion y interaccion. E programa a inclui un presentacion di entre otro e historia y tareanan di Arubahuis y di e departamento encarga cu asuntonan educacional, informacion tocante opcionnan di estudio na Hulanda y vivienda, informacion di financiamento di estudio como tambe algun dato actual y interesante riba studia na Hulanda. E tabata un mainta hopi informativo pa e alumnonan.
Minister Plenipotenciario Guillfred Besaril a manda su saludo pa e grupo y mester a disculpa su mes pa motibo di Prinjesdag cu a wordo celebra riba e mesun dia di e bishita. Arubahuis a keda un biaha mas contento cu e bishita di e grupo ja cu esaki ta di dos biaha cu un grupo di ISA ta inclui un bishita na Arubahuis durante nan viahenan di estudio pa Hulanda. Hunto cu e bishita di Colegio Arubano na mei ultimo e grupo di ISA ta e di dos scol for di Aruba cu ta bishita Arubahuis pa aña 2019. Arubahuis ta sumamente contento di por ricibi scolnan for di Aruba y pa sostene e scolnan den nan preparacion pa nan viahe di estudio. Ta mira cu mas scol ta tumando e iniciativa aki pa bin orienta riba opcionnan di estudio y bida na Hulan-da y Arubahuis ta considera esaki un desaroyo positivo pa mehora e orientacion y preparacion di nos futuro studiantenan.