Futbol femenino ta creciendo mundialmente y Arubaanse Voetbalbond (AVB) ta dedica extra atencion na e segmento aki cu un campaña pa recluta hungadonan cuminsando for di 6 aña di edad pa uni na e diferente teamnan cu tin ekipo di futbol femenino. “Women’s Football Expo” ta riba dia 16 di october proximo den Renaissance Convention Center unda cu teamnan di futbol cu tin un division femenino lo ta presente cu nan boothnan pa comparti informacion cu comunidad.
Richard Dijkhoff, Presidente di AVB a laga sa cu lo tin tambe diferente actividad durante di e dia aki y AVB ta papiando tambe cu dirigentenan di Sint Maarten pa organisa un wega amistoso e anochi prome cu e expo entre e seleccion di dama di Sint Maarten y e seleccion di dama di Aruba.
Tin hopi interes di parti di comunidad y tin hopi espacio pa crecemento di e segmento di futbol femenino y cu e expo kier logra pa e informacion di e ekiponan yega tambe na e hobennan interesa y duna asina realce na nan deseo pa hunga futbol, Dijkhoff a agrega. AVB ta gradici tanto Minister di Deporte, dr. Alex Schwengle, como CONCACAF pa e apoyo y sosten cu nan ta ricibiendo como federacion en general y particularmente pa cu e esfuersonan pa amplia futbol femenino na Aruba.
Secretario General di CONCACAF, Philippe Moggio tabata na Aruba pa reunionnan cu AVB y Gobierno y a participa na e conferencia di prensa unda cu AVB a anuncia e expo. El a bisa cu e reunionnan di e delegacion na Aruba tabata hopi productivo y CONCACAF ta celebra y apoya e esfuersonan di AVB pa motiva mas hende muhe pa hunga futbol. El a comenta cu pa e hende muhe cu ta practico futbol tin no solamente e placer di por ta parti di un deporte bunita, pero tambe tin oportunidadnan pa medio di e deporte tanto riba como p’afo di e cancha.
Un di e elementonan importante di participacion di mas hende muhe den futbol como hungado ta cu ta yuda kita e barera cultural, unda cu e muhe lo cuminsa sinti mas comodo den stadion como fanatico y sigur lo tin mas confiansa riba cancha como hungado durante weganan y training.
E prome Mundial Femenino a tuma luga na Canada na 2014 y e prome torneo internacional grandi pa mucha muhe bao di 15 aña a tuma luga un luna pasa na Orlando cu participacion di 23 ekipo. Moggio ta spera di mira crecemento di futbol femenino na Aruba y cu pronto un ekipo di Aruba lo participa na e proximo torneo U15.
Richard Dijkhoff a conclui gradiciendo Minister Schwengle, Ibisa y Minister Hooyboer-Winklaar di enseñansa pa esfuersonan pa expansion di e deporte, cu e oportunidad cu ta presenta tambe awo pa drenta scolnan cu futbol femenino pa medio di weganan y torneonan di scol, unda cu ta fomenta e crecemento y desaroyo di e deporte rey awo tambe den e segmento femenino.