Arubaanse Voetbal Bond transformando structura bieu pa nobo

Despues cu Arubaanse Voetbal Bond a entrega un plan pa reorganisa e federacion a base di su plan strategico na FIFA y esaki a keda aproba, AVB a cuminsa cu e ehecucion di e plan aki. Asina aki tambe a invita Gregory Egelbrecht di Engelbrecht Global Consulting pa sinta cu Arubaanse Voetbal Bond (AVB) y Secretario General interino pa trata un di e pasonan importante di e plan strategico pa profesionalisa AVB. Pa esaki mester crea un base p’e AVB nobo. E base ta parti di structura, manera e organogram y diferente funcionnan necesario.

Esaki ta importante pasobra den e plan strategico AVB ta delinea e pilarnan of e areanan cu e kier traha den dje, e direccion cu e kier bay, e obhetivonan cu e kier logra pa e siguiente 4 añanan nos dilanti, asina Gregory Engelbrecht, Fundado di Engelbrecht Global Consulting, a indica. E ultimo aki tin un experiencia amplio trahando na FIFA na Swisa y como tal por duna un bon na AVB.

Durante e “Kick off meeting” aki, e Presidente, Secretario General di AVB y Engelbrecht Global Consulting a repasa e plan strategico y evalua kico tur AVB kier logra pa link esaki na e structura cu e federacion mester pa por hinca nan den otro y logra e metanan.

A defini tur locual ta haciendo den 3 fase, e prome ta defini e organogram y pa describi e funcionnan critico. Den e organisacion mester algun funcion y e idea ta pa caba esaki na final di maart pa asina tin un structura cu por uza na april caba pa contrata ehecutivonan nobo of pa guia esunnan cu tin actualmente. E siguiente fase ta pa introduci e organogram y e funcionnan oficialmente y despues defini otro funcionnan cu falta ainda. Esaki ta un trayectoria un tiki mas largo, pero e trabounan lo cuminsa una bes cu introduci e funcionnan. Lo haya un proceso pa cumpli cu e funcionnan, cumpli cu e rekisitonan di funcionnan y evaluacion di cada un persona cu ta traha den un di e funcionnan.

Despues cu AVB a lansa e plan strategico, awo ta ehecutando e proyectonan cu ta prescribi den e plan. “Un di e pilarnan cu AVB ta traha riba dje ta pa profesionalisa e organisacion”, asina ing. Richard Dijkhoff, Presidente di AVB, a expresa. AVB kier logra trece claridad den e organisacion, con esaki mester ta y. e funcionnan cu tin den e organisacionnan. Tambe prescribi e rol y e responsabilidad di cada funcion.

Haciendo esaki lo trece un claridad, no solamente interno pero specialmente externo, pa compronde con e federacion ta funciona desde awo en adelante. FIFA ta eherciendo hopi cambio pa profesionalisa e federacion. ing. Richard Dijkhoff ta convenci cu tur hende por compronde cu e federacion no ta un club di famia, club di amigo of djis ban haci algo, pero e federacion por ser considera como un organization professional, un compania.

E idea ta pa purba hinca e structura bieu di e federacion den un structura nobo. Reynaldo Geerman, Secretario General interino, a expresa cu e structura nobo aki ta rekeri varios cambio pa miho, pa un AVB hopi mas profesional, eficiente, cu un vision transparente y cu metanan di duracion corto, mediano y di tempo largo. E diferencia ta cu den e structura nobo e federacion ta traha transparente y tur partner ta na altura di e vision y di e metanan cu mester logra.

Comments

comments