Arubaanse Kunstkring Ta Sigui Celebra su 70 Aña cu un Concierto di e Guitarista Venezolano Luis Enrique Quintero Santamaria: Skirbi pa Clyde Harms

Arubaanse Kunstkring ta presenta Luis Quintero Santamaria, den un concierto diadomingo 11 di September na Cas di Cultura. E concierto ta cuminsa 11’or di mainta en punto. E guitarista lo no ta acompaña pa otro musico.
Luis Quintero Santamaria a toca diferente biaha caba na Aruba. Na Januari 2006 el a duna un recital su so den e Marriot Grand Ballroom y un aña despues, na e mes lugar, el a toca atrobe acompaña pa un ensemble di tres musico. Na Augustus 2009 mi tabatin e privilegio di scucha Quintero tambe na un concierto di Festival Nuevo Mundo di Maracaibo den e Auditorio del Banco Central de Venezuela.
Luis Quintero Santamaria a yega di toca acompaña pa e gran guitarista Arubiano Ivan Jansen. Contrario na Jansen cu ta un maestro den musica di Jazz, manera cu el a comproba cu su ultimo concierto na Cas di Cultura y cu su CD Horizonte Nobo, Luis Quintero Santamaria ta mas tradicional den su tocamento. Su programanan tambe ta mustr’e como mas clasicista y ta inclui canticanan di hopi pais Latino Americano, especialmente di su patria Venezuela.
Recientemente cu Luis Quintero Santamaria a celebra su di 35 aña como guitarista profesional, tabatin un concierto di guitara como homenahe p’e na e famoso Teatro Teresa Carreño di Caracas. Un cantidad grandi di celebridadnan mundial tabata presente pa mustra nan aprecio pa e musico Venezolano. Te hasta e gran guitarista clasico Mexicano Daniel Olmos, a participa, patrocina pa e Gobierno di su pais y e embahada di Mexico na Venezuela.
Luis Quintero Santamaria ta un fanatico di Alirio Diaz, e gran guitarista clasico di Venezuela cu a muri na edad di 92 aña na Juni di e aña aki. Andrés Segovia a yama Alirio e miho guitarista di su epoca. Den su programa na Aruba na 2006 y na 2007 Quintero Santamaria a dedica “el Pajarillo”na Alrio Diaz. E ta clausura su programa di dia 11 di September cu un areglo pa guitara di e defunto Alirio.
E programa varia ta enfatisa musica di America Latino. Suite Caucasiana di Laurent Butros, Frances di nacemento; Siempre me acuerdo de ti, di e propio guitarista; Corazon que siente di Ernesto Nazareth (Brasil) y Po’ de Mico di Joao Pernambuco (tambe di Brasil); Elegía di Johan Kaspar Mertz, (guitarista virtuoso di Hungria); Chopi di Pablo Escobar (no, no esun di Medellin. Esun aki ta di Paraguay); Jenny di Terry Pazmiño (di Ecuador); dos walz Quinta Anauca y De Conde a Principal di Aldemaro Romero (Venezuela); Maria Luisa, Angostura, Carota y Natalia, cuater wals di Antonio Lauro (venezuela) y pa finalisa, Los Caujaritos di Ignacio Figueredo cu areglo pa guitara di Alirio Diaz.
Carchi pa e concierto di dia 11 di September ta obtenibel na Boekhandel de Wit y Van Dorp, Plaza Bookstore y na Superfood. Entrada pa adulto ta 30 florin. Mucha ta paga solamente 15 florin. Percura pa abo tambe ta den Cas di Cultura dia 11 di September.

Comments

comments