Despues cu nos atletanan di landamento a cosecha exito den e competencia internacional Carifta Swimming Championship 2018 na Jamaica como tambe den e di 12 edicion di e competencia internacional teni na Aruba mes esta e Stingray Challenge, awo a yega e ora pa bataya den e competencia local di landamento porcierto esun di mas grandi di aña esta e Arubaanse Kampioenschappen.
E atletanan di landamento di e miho clubnan na Aruba manera entre otro Stingray Swimming, Aruba Dolphins y The Orca’s Swimming y Sports 4U, lo topa otro cara cara e dianan 7 pa 10 di juni. E cas di landamento na Aruba, Piscina Olimpico Roly Bisslik na Savaneta lo host e cuater dianan di competencia. Notable ta cu e atletanan formando parti di e seleccion di landamento no lo participa na e Arubaanse Kampioenschappen, nan lo sigui prepara nan mes pa e CCCAN. E orario di competencia lo ta diahuebs 7 juni : warm-up 5:30 PM, inicio competencia 6:30 PM, Diabierna, 8 juni: warm-up 6:00 PM, inicio competencia 7:00 PM, Diasabra, 9 juni:warm-up 8:30 AM, inicio competencia 9:30 AM, Diasabra, 9 juni: warm-up 5:00 PM, inicio competencia 6:00 PM y Diadomingo, 10 juni: warm-up 8:30 AM, inicio competencia 9:30 AM.
Den luna di April, nos seleccion di landamento a conkista varios medaya di Oro, Plata y Brons den e diferente disciplinanan cu nan a competi na dje durante di e Carifta Swimming Championship 2018 teni na Jamaica. E cuarteto Flory Kock, Keeley Maduro, Anahi Schreuders y Elisabeth Timmer conoci tambe como e Golden Girls a sobresali den e compentencia aki unda nan a sa na conkista medayanan di Oro y Plata y Brons den relay, mescos ta conta tambe pa otro landadonan cu tambe a hasi un tremendo papel.
Dentro di algun siman lo inicia na Aruba, un di e competencianan di landamento mas grandi den nos region esta e Central American and Caribbean Swimming Championships (CCCAN) cu lo conta cu participacion di mas o menos 300 atleta. Sin duda e lo bira un bon oportunidad pa nos propio atletanan di landamento briya na cas, apoya pa nos publico.
Stichting Sportsubsidie Aruba tambe a yuda subsidia e Arubaanse Kampioenschappen den e deporte di landamento organisa pa e federacion di landamento Arubano, A.Z.B.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Stichting Sportsubsidie Aruba.