Diadomingo 11 di December, e federacion di esgrima SABA lo tene nan tradicional Arubaanse Kampioenschappen den e sala di recreacion di e scol Cristo Rey na Brazil. E competencia aki tabata programa pa tuma luga den luna di November pero debi na e awaaero pisa e competencia no por a sigui na e scol di Cristo Rey. Mirando cu den un principio mester a organisa e Copa Jerry Gomes den luna di December a opta pa organisa e Arubaanse Kampioenschappen, mientras cu e competencia di Copa Jerry Gomes lo keda pendiente.
E inscripcion a tuma luga pa 9or di mainta mientras e competencia mes a inicia pa 10or di mainta. Clausurando e aña exitoso tras di lomba, pa e federacion di Esgrima, esaki lo ta ultimo competencia pa loke ta e aña 2016. Mester bisa cu e atletanan di e tres clubnan di esgrima na Aruba esta Universal Fencing Club, Scherm Club Brazil y Don Bosco Knights ta duna un berdadero espectaculo den e deporte di arte martial. Tin varios prospecto y talento nobo den e deporte di arte martial mientras cada dia e ta bira mas popular.
Un danki sigur na Lotto, e Loteria di Aruba pa medio di Comision di Subsidio cu a subsidia e competencia di esgrima Arubaanse Kampioenschapen 2016.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.