Durante Happiness 360 Conference, Aruba Tourism Authority y Curacao Ports Authority a firma un acuerdo pa colabora hunto y trece mas turismo di crucero pa ambos Aruba y Corsou.
E acuerdo ta encera entre otro cu Aruba y Corsou lo bay intercambia informacion relata na industria di barconan crucero pa asina hunto cay mihor den un liña y genera mas entrada pa ambos pais.
E acuerdo aki ta pa un periodo di dos aña y tin como meta pa genera actividad economico y prosperidad pa ambos destinacion. Firmantenan ta Raul Manotas, CCO di Corsou Ports Authority y Ronella Tijn Asjoe-Croes, CEO di ATA. Ambos Aruba y Corsou semper ta buscando oportunidadnan nobo pa crea un bentaha competitivo den mercado turistico y e aliansa nobo aki su proposito ta pa atrae liñanan di crucero pa tuma ambos destinacion den nan itinerarionan, stimulando asina actividad di barconan crucero den region sur di Caribe.
“Como e di dos nacion mas dependiente di turismo na mundo -y di prome den Caribe-, Aruba ta reconoce e importancia di traha hunto cu partnernan local, particularmente den parti sur di Caribe, pa asina yega na resultadonan cu ta positivo pa ambos partido”, asina Tjin Asjoe-Croes ta splica. “Pa añanan caba nos tin un bunita lazo cu Corsou y nos ta contento pa por fin por partner formalmente cu Curacao Ports Authority pa asina por eleva e exito di turismo di crucero na ambos pais.” Manotas di su banda ta bisa cu e ta sigur cu e acuerdo firma lo bay trece mas exito pa riba tereno di turismo di crucero, expandiendo oportunidadnan pa ambos pais den futuro.
Pa Aruba, metanan ta inclui expande den e area di barco nan mas chikito/mas afluente, expande orario cu barconan ta keda riba nos isla, y entre otro sigura fluho di turismo crucero durante lunanan unda esaki ta mas abou.