Recientemente un ekipo di Aruba Tourism Authority a reuni na Bogota, Colombia pa asina topa cu agencianan cu potencialmente por brinda A.T.A. cu servicionan di mercadeo, na un manera integral y pa e region di Latino America completo.
Actualmente e oficina di Aruba Tourism Authority ta haci promocion den 9 diferente mercado. Esfuersonan ta wordo haci pa atrae bishitantenan cu ta procedente di Argentina , Uruguay, Paraguay, Colombia, Chile,Peru, Brasil, Venezuela, y recientemente Mexico tambe. Pa logra mercadia Aruba exitosamente den e region aki, A.T.A. ta traha cu diferente agencia pa diferente disciplina y den diferente pais. Asina aki e ekipo di A.T.A. ta traha cu agencianan cu ta experto den “online advertising”, publicidad tradicional (“offline advertising”), “social media”, y PR.
Contrario cu con e proceso ta actualmente pa mercadia Aruba den e region aki, A.T.A. a explora e posibilidad pa integra tur esfuerso, lagando e trabou resorta bou di un solo agencia, claro ahustando e strategia pa mercado unda ta necesario.
Conforme cu e vision nobo aki, Aruba Tourism Authority a bay en busca di un agencia cu ta capacita pa ofrece un servicio integral y solucion riba e tereno di mercadeo y promocion di Aruba. Na final e agencia aki lo ta trahando cu A.T.A. durante un periodo di 2 aña cuminsando na 2017.
A forma un comite cu lo selecciona e agencia cu lo keda encarga cu e tarea aki. Pa garantisa cu tur aspecto clave den e proceso aki wordo tuma den consideracion. E comite y delegacion cu a finalisa e proceso na Colombia a consisti di; CEO di A.T.A, Ronella Tjin-Asjoe-Croes, Sanju Luidens CMO di A.T.A., Sjeidy Feliciano Communications Manager, Miriam Dabian Area Director pa A.T.A. LATAM, Francis Lacle Digital Specialist, Maria Victoria Galán Directora di Colombia, y Johana Santiago PR & Communication Manager Venezuela/ Digital marketing Latin America.
E proceso pa selecciona e agencia a cuminsa cu un comunicado na diferente agencia indicando cu A.T.A. ta interesa den un agencia cu por brinda un servicio integral pa cu e region di Latino America riba e tereno di mercadeo. Parti di e servicio lo mester cubri “online y offline advertising”, mercadeo personal (Below The Line marketing), maneha y posiciona e diferente websites di Aruba den e region (es.aruba.com, aruba.com.br y conocearuba.com), PR, y maneho di rednan social. A base di e rekesitonan aki, e comite a evalua nuebe agencia unda a scoge e mihor cuaternan pa asina reuni cu nan. E delaster aki a sosede durante e reunionnan cu a tuma luga entre 21 y 24 di November na Colombia. Awo ta toca e comite pa traha riba e ultimo rekisitonan pa concretisa e proceso riguroso di varios luna y scoge e agencia ganado. Claro cu e strategianan integral cu a wordo presenta lo ta mara na crea un boost den e region y ta mara na targets nan pa crece mercadonan den e region.