Recientemente e ekipo di Aruba Tourism Authority tawatin nan retreat anual na unda cu e aña aki tawatin como tema “shaping our fundamentals”. Durante un dia e ekipo a bini hunto pa dialoga y den forma di ehercicionan educativo a enfoca riba e balornan y normanan cu como organisacion ta di gran importancia.
A toca diferente temanan manera e cultura di e organisacion, trabou den ekipo, compromiso y empoderamento di cada miembro cu ta esencial pa sigui haci di e ekipo di A.T.A. uno hopi fuerte y cla pa sigui maneha den e esfera dinamico cu e ta opera den dje. Tambe a profundisa riba e tema di integridad y etica di trabou.
E mihor forma pa sigui traha na bienestar di un organisacion ta pa hunto discuti y como ekipo bin cu sugerencianan riba tur nivel, cada miembro di ekipo tin cu duna su aporte. E ekipo aki tin un gran responsabilidad di traha tur dia pa Aruba su turismo, economia y bienestar.
E dia a bay den un ambiente hopi ameno na unda tur miembro di ekipo por a participa y dialoga na un manera hopi positivo. E moderador pa cu e “retreat” aki tawata Sra. Nathaly Cabrera di e compañia Dynamis cu tin hopi experencia den e tipo di entrenamentonan aki.