Diasabra ultimo durante Grand Lighting Parade Oranjestad, Aruba Tourism Authority a desvela locual ta bira e proyecto di ‘Aruba ta presenta The Invaders and Steelpan History’. Un proyecto di un gran magnitud y bunitesa cu lo ser admira durante Parada di Luz San Nicolaas, sigui pa Parada Grandi di San Nicolaas, y Parada Grandi di Oranjestad.
E iniciativa remarcabel aki a conta cu participacion legendario di Aruba Invaders, e banda di steelpan di mas bieu y stima na Aruba. Cu un historia rico di mas cu 70 aña, Aruba Invaders a sa di domina e arte di musica y a dedica nan mes pa pasa nan conocemento musical y herencia cultural di musica di steelpan na diferente generacion.
E presentacion di e trailer di A.T.A. hunto cu Aruba Invaders tabata e punto di atencion riba e anochi magestral aki. Por a presencia mensahe general di A.T.A., un presentacion di videonan di carnaval di antes te cu awor, y tononan musical di steelpan mas emblematico di Aruba. E bunita colaboracion aki tabata un celebracion y un regalo na e comunidad di Aruba dedica na e legado cultural di Aruba su carnaval.
Alabes, A.T.A. a pone disponibel un Qr-Code riba e trailer cu ta brinda detayenan tocante e proyecto den su totalidad, historia, diferente video y musica di pasado te awor. Nos ta invita e comunidad pa scan esaki durante di parada of bishita https://www.aruba.com/us/our-island/history-and-culture/steelpan-history.
Un invitacion ta ser extendi na e comunidad local y bishitante di e isla pa uni nan mes na e proyecto historico aki. Disfruta di e ritmo contagioso, captura momentonan inolvidabel, y bira parti di e legado carnavalesco cu lo keda resona den e cayanan vibrante di Aruba.
Un danki special na Go Cultura Foundation y Elite Productions, y na e siguiente organisacionan pa cu nan contribucion y conocemento: Departamento Arubiana-Caribiana di Biblioteca Nacional di Aruba, Sra. Graciela Nedd-Cheng, Archivo Nacional di Aruba, Sra. Maybelline Arends-Croes, Rebecca Roos Productions, canal di YouTube: Roos Productions.
Tocante Aruba Tourism Authority (A.T.A.)
Desde 1 di januari 2011, Aruba Tourism Authority ta opera como un ‘Sui Generis’. Un organizacion independiente den e esfera publico. Aruba Tourism Authority ta fungi como ‘Destination Marketing and Management Organization (DMMO)’ y ta responsabel pa uni interes turistico entre socionan local y internacional, cu e proposito di coordina cu diferente di e socionan aki, mercadeo pa e destinacion, y desaroyo di e destinacion.
Tocante Aruba Invaders
Durante decada ‘40, bou guia di maestro Trinitario Leonard Turner, “The Invaders” a inicia un revolucion musical na Aruba, trahando melodia cu drum di Refineria di Lago. Na 1948, The Invaders a bira e prome orkesta di steel profesional di e isla. Pa despues Vincent Bacchus uni na 1951 cu formación di “The All Stars Steel Band.” Cu tempo, a surgi mas maestro manera Paul Connor cu ‘Caribbean Stars’ y Dennis Jones cu su mesun banda unico. Na 1952, Edgar Connor, e tocado di steelpan di mas hoben, a forma su banda y asina a stimula y profila bandanan di steelband cu ritmo y estilonan caracteristico. Awendia, Aruba Panman Foundation, encabeza pa Sr. Lee Connor di Aruba Invaders, ta preserva e legado pa continuacion di e tradicion hunto cu demas rumanan Connor.
