Por a nota den corant Bon Dia Aruba, cu un articulo caminda cu ta bisa cu na Cuba tin 2156 persona riba 100 aña. Edwin Jacobs, director di SVB, a indica cu nan a paga pensioen di biehes pa luna di Juni y riba e lista ey ta aparece 17 persona cu ta biba na Aruba, riba 100 aña, di cual e personanan di mas edad den nan sistema ta 108 aña y pa algun tempo caba ta e persona cu mas edad alcansa riba nos isla. E hende homber di mas edad, tin 103 aña, segun Jacobs.
Pa e proximo 2 pa 3 aña lo bay tin 38 persona para den ley, y nan tambe lo bay ta crusa e liña magico di 100 aña y no tin duda den esey. E sistema di cuido medico, nos calidad di cuido medico, ta uno di nivel cu ta permiti nos yega asina leu tambe.
Cuba, hunto cu Uruguay, ta e poblacionnan mas embeheci den nos continente y por sigura cu Aruba su poblacion ta competi cu nan dos. Ya nos poblacionnan, Cuba, Uruguay y Aruba, a yega e fase di embehecemento. Nos a pasa e di cuater fase cu Cepal, cual ta e comision economico pa Latino America y Caribe di poblacion di Nacionnan Uni, a distingui cuater fase di embehecemento di un poblacion y e ultimo fase cu a distingui, ta e fase avansa. E indicadornan di 2015, nos poblacion ta den e fase avansa aki y nos ta drentando locual na Uruguay nan a cuminsa denomina e proceso di embehecimento di e embehecimento. Ta un bendicion pa nos poblacion. Ta nifica cu nos esfuersonan den siglo pasa di programanan di vacunacion den añanan 60, programanan cu ta core via Stichting Wit Gele Kruis. Programanan di vacunacion infantil cu ta core via Departamento di Salud Publico, ademas di e cuido medico cu nos tin y sigur tambe implementacion di AZV na 2001, tur ta duna un contribucion cu tabata un exito den nos salud publico, cu nos pais tin e bendicion di embehece.
Bira grandi tin su retonan social y economico pa cual na Aruba ta trahando pa esaki segun Jacobs ta splica. Desafionan den comunidad. Eynan Jacobs tin preocupacion pasobra no ta sinti den nos comunidad e conciencia cu den e fase di cual nos ta di embecemento.
Embehecemento ta bay trece desafio y retonan grandi pa financiamento di nos sistemanan di siguridad social. Esey ainda ta spera cu proximamente y di parti di SVB, cualkier momento cu tin ta duna informacion na comunidad, pasobra ta kere ta importante pa ta conciente di nos desafionan cu e bendicion aki ta trece cun’e. Y mester ta semper prepara pe. E poblacion ta embehece. E momento aki ta, di e poblacion local 53% ta pensionadonan entre 61 aña y 70 aña. E aña aki edad di pensioen a subi bay na 61 y mey. 53% di nos poblacion di nos pensionadonan ta bao di 70 aña. Ta edadnan cu un tempo bo tabata un edad halto. Pero awendia ta un edad cu ser humano ta den condicionnan basta bon, compara cu 50 y sigur 100 aña pasa.