Tur aña Stichting Monumentenfonds Aruba (SMFA) ta celebra e ‘International Day for Monuments and Sites’ riba 18 di april. Door di e crisis no por celebr’e manera ta custumbra, pero toch kier a para keto na e dia aki. E aña’ki tambe ta celebra e 25 aña di existencia di Stichting Monumentenfonds Aruba (SMFA).
International Day for Monuments and Sites.
Cu e idea pa celebra patrimonio cultural rond mundo, UNESCO a establece 18 di april como ‘International Day for Monuments and Sites’ na 1983. E obhetivo di e celebracion aki ta pa sensibilisa e publico tocante e diversidad y vulnerabilidad di monumentonan y sitionan patrimonial construi rond mundo y e esfuerso cu mester pa proteha y conserva nan. Tur aña ICOMOS ta scoge un tema nobo a base di cual diferente pais ta trece conscientisacion tocante e importancia di nos monumentonan como parti esencial di nos patrimonio cultural. E tema di e aña’ki ta ‘Complex pasts, Diverse Futures’.
Complex Pasts
E tema di e aña’ki sigur ta un tema bon conoci pa Aruba;. E historia di nos isla ta compleho y ta consisti di varios fase. A haya influencia di hopi otro cultura di rond mundo. E resultado di e historia compleho aki ta un variacion grandi di cultura cu hunto ta forma e mix cu nos ta yama ‘Arubiano’. Historia a laga varios lastro visibel den nos herencia cultural. Di restonan di habitantenan Amerindio (arkeologia) te cu casnan di Lago na Colony (America di Norte), casnan y tiendanan di añanan ’30 na Playa (Colombia), dakpan (Hulanda), varios ‘club’ na San Nicolas, herencia industrial (tanki di awa Kibaima, goldmills) etc.
Den e ultimo 25 añanan SMFA a desaroya un vision mas amplio. E prome añanan a enfoca hopi riba monumentonan grandi y cu cierto status, principalmente na Playa. Restauracion di cas di dokter Arends, cu a bira Stadhuis y Censo por ehempel. Despues a enfoca mas y mas riba e storianan tras di e monumentonan y tambe a enfoca mas riba e casnan ‘van de gewone man’ cu tambe a hunga un rol importante den e desaroyo di nos pais y cultura. A investiga full e storia tras di Uncle Louis Store y a cumpra Cas Tan Tin cu a bira museo. Asina, poco-poco, por duna un miho bista riba e bida diario di antes. Awendia SMFA ta doño di un coleccion grandi di monumentonan rond di Aruba den tur forma y tamaño.
Diverse futures
Stichting Monumentenfonds Aruba lo keda duna mas y mas atencion na nos herencia multicultural. E conexion entre nos herencia tangible (monumentonan) y intangibel (storianan, pero tambe musica, arte, cuminda) ta keda hopi importante. Pa e motibo aki tambe e Fundacion ta pone atencion na educacion y conscientisacion tocante nos Aruba su monumentonan. Esaki nunca nos por logra sin e bon cooperacion di un cantidad grandi di partnernan. Nan kier a gradici tur nan partnernan sperando cu nos lo por sigui traha hunto riba diferente proyecto.
Monumentenfonds semper ta busca informacion tocante herencia, sea ta portretnan di antes, storianan of artefactonan. Un y tur cu tin informacion por tuma contacto libremente cu SMFA via [email protected], Facebook page Stichting Monumentenfonds Aruba of Instagram @monumentsfundaruba.
“Ora nos ta consciente di nos historia nos ta siña y por aprecia locual cu nos tin awo y prepara bon pa futuro. “