Durante e di 112 Conferencia Internacional di Trabou (ILC) na Geneve, Suisa, e Secretario-General di e Asociacion Internacional di consehonan Social y Economico y Institucion comparabel (AICESIS), Apostolos Xyrafis, a duna atencion special na e presencia di e delegacion di Corsou. E conseho Socio-Economico (SER) di Corsou ta tene e presidencia di AICESIS for di november aña pasa, un posicion cu ta subraya e influencia y liderato creciente di e isla.
Den su discurso, e Secretario-General a mustra su aprecio profundo pa e Organisacion Internacional di Trabou (ILO) y a enfatisa e rol crucial di AICESIS den promove forma institucional di dialogo social, husticia social y stabilidad economico. “E presidencia di Corsou ta marca un gran logro pa nos organisacion y ta refleha e dedicacion di nos miembronan na nos mision comparti,” asina e Secretario-General a bisa.
AICESIS, funda den 1999, ta representa consehonan Economico y Social (ESC’s) y institucionnan comparabel di mas cu 70 pais. E asociacion ta sirbi como un plataforma pa dialogo y cooperacion entre consehonan di acesorio socioeconomico y institucion di dialogo social rond mundo. E cooperacion cu ILO, cu a cuminsa den 2012 y a renoba den 2018, a yega na hopi iniciativa comparti cu ta fortalece e efectividad di consehonan di acesorio social den forma politica di trabou y maneho social. Mas laat e aña aki, lo firma un acuerdo nobo di cooperacion cu ILO.
Ta mira e presidencia di SER di Corsou como un indicacion di e papel creciente di paisnan chikito den formacion di politica mundial. Secretario-General Xyrafis a enfatisa cu dialogo social institucional ta uno esencial pa gobernacion democratico, cohesion social y resiliencia economico. “Den un epoca di progreso tecnologico rapido, cambionan demografico y problema di medioambiente serio, e necesidad pa mecanismo di dialogo social robusto ta mas urgente cu nunca,” el a indica.
Prueba empirico ta demostra cu paisnan cu bon organonan di acesorio socioeconomico ta demostra nivel mas halto di confiansa social, desigualdad di entrada mas abou y mercado di trabou mas resiliente.
Na Europa, Latino America y Africa, e consehonan aki a contribui na negociacion di e pactonan social y na mehoracion di derecho y condicion di trabou.
E discurso a finalisa cu un promesa renoba pa intensifica e cooperacion cu ILO y dirigi esfuersonan di AICESIS riba cuestionnan emergente, manera digitalisacion, aparicion di inteligencia artificial, cambio climatico y transicion demografico. “Hunto nos por uza e poder di dialogo social pa construccion di un mundo. mas busto, imparcial y prospero,” asina e Secretario-General Xyrafis a conclui.
E presencia y rol activo di e delegacion di Corsou durante e conferencia aki ta subraya e compromiso dedica di e isla pa contribui na desaroyo inclusivo y sostenibel riba nivel mundial.
Tin di remarca adicionalmente cu Aruba tambe tin un delegacion presente n’e conferencia aki, encabesa pa Minister Glenbert Croes.