Den fin di siman a tuma lugar e di 9 Costa Rica Open cu tabata un evento di rango G1 y tabata tin 5 participante di Aruba cu a participa na e evento grandi aki. Sr. Teofilio Rodriquez e coach di Aruba a haci un tremendo trabou y Aruba por ta orguyoso. E atletanan di Aruba a logra 2 medaya di plata y uno di brons.
Chiara Petrocchi tabata Aruba su prome medaya di plata. Chiara Petrocchi kende a bringa den e categoria di Junior -46 kilo a haci tur cos den su poder pa por a logra su peso pa asina por a cuminsa diadomingo atardi. Chiara Petrocchi su prome pelea tabata contra di Michelle Ordoñez di Guatemala y Chiara Petrocchi a gana esaki 13-1.
Despues Chiara Petrocchi a topa cu Daniela Perez for di Chile y Chiara Petrocchi a gana esaki tambe.
Un bes den final Chiara Petrocchi a topa cu Dalila Dietschi for di Argentina y e pelea a termina 0-0. Aki a bay sudden death y niun di dos atleta no a score. Den e caso aki e referee a dicidi cu Dalila Dietschi for di Argentina ta ganador.
Jourdé Klabér a logra gana su prome pelea contra di Edwin Drummond for di Merca. Jourdé Klabér a perde den cuart final 2-1 contra di Chile y mester a keda satisfecho cu su Brons. Hakeem Lowe a logra gana medaya di plata bringando Taekwondo na e old school style.
Záhyon Klabér y Rasheed Lowe a perde nan prome pelea.
Aruba Taekwondo Bond ta hopi contento cu e resultadonan di e atletanan di Aruba hunto cu e coach di Aruba cu a haci esaki posibel.