Diamars atardi, e federacion di tenis di mesa a organisa un competencia en conexion cu e celebracion riba Dia di Rey. E Copa Rey a wordo hunga den tur categoria di infantil te A klas mientras cu siman pasa ya caba e mastersnan a finalisa e torneo aki. Mester bisa cu un cantidad grandi di hungador a presenta pa asina hunga e torneo aki cu tuma lugar den Club Estrella na Sta Cruz. E weganan tur tabata riba un bon nivel, nos por a nota cu principalmente e hobennan ta bin ta desaroya den un bon forma y ya caba ta duna bon bataya na esnan mas experencia cu pa hopi anja ta domina e deporte aki na Aruba.
Siman pasa e delegacion di tenis di mesa a haci un tremendo papel den e Caribbean Cup Championship na Guyana unda nos seleccion a logra conkista varios premio den teams, dobbel y single. E hoben Ching Ho Chung a logra termina na un di dos lugar den U-15 esaki den henter Caribe cual ta un prestacion sublime.
Nos tin e siguiente resultadonan
Den e categoria Masters e prome lugar a bay pa Franklin Lopes, na di dos lugar a termina Alfred Leong mientras na di tres lugar a caba James Letren. Den CAT U10 nos tin na prome lugar Nathan Lobo, na di dos lugar Dwayne Hart y na di tres lugar Denziel Hart. Den CAT U13, nos tin na prome lugar Robert Dirksen, na di dos lugar Bob Chung y na di tres lugar Mikayla Mathilda.
Pa loke ta e CAT B KLAS, aki e ganador a resulta Donald Yarzagaray, na di dos lugar a keda Wingchow Leong y na di tres lugar a termina Zhao Xie. Por ultimo nos a haya e sorpresa den e Open Klas. Aki Mario lobo ta logra triunfa na prome lugar, pero na di dos lugar a keda Ching Ho Chung cu Jonathan Paredes net su tras na di tres lugar y Andy Gomes na di cuater lugar.
Un danki sigur na Lotto, e Loteria di Aruba pa medio di Comision di Subsidio cu a subsidia e torneo Copa Rey den e deporte di tenis di mesa.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.