Segun parlamentario Sra Arends-Reyes na aña 2006 World Economic Forum a introduci e Indice di distincion global entre e generonan. Central Bureau of Statistics di Aruba CBS tambe a enfoca ariba e topico internacional aki durante nan Censo na October 2010. E indice aki ta enfoca ariba cuater categoria fundamental: participacion Economico, oportunidad, Educacion, Salud y sobrevivencia y fortificacion di participacion politico. Nos isla a score relativamente bon compara cu Merca, Hulanda y algun area di Caribe. Algun punto cu ta remarcabel ta cu nos indice di participacion di nos generonan den e area laboral ta casi igual. Na aña 2012 23,162 (64,6%) hende muher ta participa den e mercado laboral compara cu 23,362 (70,7%) hende homber. Y segun e ultimo cifra pa 2015 hasta a conose un shift caminda cu mas hende muher a participa den mercado laboral cu 66,7 % cu ta 23,915 y hende homber cu 58,6% cu ta 21,010.
Alabes den e arena politico tambe e participacion di hende muhe a crece y awe nos por ta orguyoso di tin un pais cu tin mas participacion di hende muhenan cu tin influencia. Un di e puntonan di atencion ta pa yega na un ‘gender parity’ caminda tin mesun hopi hende homber cu hende muhe den un organisacion, esaki ta un meta ambicioso pero e ta bon pa semper tin e den mente. E punto di bista di politiconan femenino ta importante, politica ta keda un ambito cu ta ser domina pa hende homber caminda cu hopi biaha pa competi e ser femenino ta purba di imita e hende homber door di trata di ta rabia of grita sin tin mester. E politiconan femenino ta diferente y nan bos mester resona sin mester di grita of bira agresivo. E politica di awendia rond di mundo no ta facil, e ta rekeri hopi sacrificio, oranan largo for di cas y mester soporta hopi insulto. E no ta keda un profesion cu lo ta atractivo pa hende muhenan pero e ta uno sigur importante. Fuera di e participacion real den politica naturalmente cu nos tin hopi mas pa traha ariba dje pa avance di nos hende muhenan. Por ehempel salario pa e mesun trabou ta keda diferencia cu un averahe di 700 florin. Aunke cu mester bisa cu e loonkloof manera nan ta yame den sector priva di desigualdad salarial den 2011 tawata 18.8% y awor na 2015 e la baha te na 13.3% kiermen en todo caso pa Aruba por bisa cu nos ta bayendo den e bon direccion pa kita e discriminacion riba pago igual pa e mesun posicion. Aruba su hende muhenan ta hendenan balente, trahado y valioso como cu nan ta e weso di lomba di cada hogar. Ta importante pa nos traha hunto como comunidad pa sigui sostene nos hende muhenan. Banda cu tin diferente bon desaroyo toch mester bisa cu ainda tin demasiado caso di muchanan hoben cu ta cay den garanan di ‘sugar daddies’, ainda tin demasiado caso di violencia domestico y abuso emocional na cas. Durante e conferencia di Hende muhe, e actriz Mericano Mira Sorvino a enfatisa e importancia pa crea un comunidad alerta pa tur sorto di abuso y e ta un persona cu ta boga pa crea conscientisacion ariba e topico di trafico humano. E ta splica cu sugar daddies por ehempel cu ta un fenomeno cu Aruba conoce specialmente cu hobennan ta un forma di trafico humano of explotacion di hende. Mayornan y maestronan mester ta alerta y sigur preveni y interveni den caso cu ta sospecha di casonan asina. Tambe como un isla turistico hotelnan y trahadonan di hotel y den e industria di aerolinea tin un papel importante pa ta alerta y raporta tur caso cu ta mustra sospechoso. Internacionalmente diferente cadena di hotel y aerolinea ta afilia na asina yama ‘code of conduct’ caminda ta raporta momento cu ta sospecha actividadnan inusual manera hobennan menor di edad cu ta drenta hotel of viaha cu hendenan di edad mas grandi cu nan y ta actua sospechoso. Internacionalmente hopi caso di abuso sa pasa den hotelnan of trafico humano via di aerolineanan. Ta yega momento pa trece mas conscientisacion pa e topico aki y pa pone sistemanan pa yuda preveni y combati casonan lamentabel. Sra Arends-Reyes su mensahe pa hende muhenan ta pa nan sa nan balor y sigui lucha pa bay dilanti den bida.