E temporada di horcan ta cuminsa mañan dia prome di juni y ta caba dia 30 di november. SEgun e informenan di National Hurricane Center y e Universidad Estatal di Colorado, ta spera cu esaki lo ta un temporada hopi activo e aña aki.
Colorado State University, den su prome informe emiti na april, ta pronostica un aumento significativo den e cantidad di tormenta cu nomber, horcan y horcan mayor. Mientras cu e promedio normal di tormenta cu nomber ta di 14,4, e aña aki ta spera 23. Ta premira 11 horcan compara cu e promedio di 7,2 y 5 horcan mayor na luga di 3.2 normal. E dianan di tormenta cu nomber tambe lo aumenta di 69,4 pa 115. Esaki ta ilustra un temporada di horcan hopi activo den Caribe, Atlantico y e region.
E ekipo di Meteo, consistiendo di 8 persona, ta monitor 24/7 y ta coordina estrechamente cu CMO pa emiti e alertanan adecua y sigura e siguridad di e isla. E temperatura di e superficie di lama actualmente ta mas halto cu normal, loke ta aumenta e energia disponibel p’e formacion di horcan. Fuera di esey, e transicion di El Niño pa La Niña ta faborece e formacion di sistema tropical den Atlantico y Caribe.
Coordinacion y preparativo
Rodney Tromp, di e Departamento di Meteorologia, ta splica cu nan ta traha hunto cu CMO y otro entidad meteorologico pa coordina e alertanan. Ora cu tin menasa p’e region, National Hurricane Center ta coordina cu e islanan afecta pa emiti alerta cu 24 ora di anticipacion. Aunke Aruba y Corsou ta cerca, cada isla tin su efectonan local diferente cu ta influencia den e pronosticonan diario. Sinembargo, durante e temporada di horcan, nan ta colabora estrechamente cu KNMI (Hulanda), Corsou, Aruba y National Hurricane Center pa emiti advertencia.
Importancia di coordinacion regional
Rino Hermans, director di CMO, ta señala cu e aña aki ta spera un temporada di horcan mas activo den e regio di Caribe y Atlantico, cu un 85% mas di actividad debi n’e temperatura mas cayente di awa y e efecto di La Niña. Esaki por duplica e dianan di tormenta activo, di 60 pa 110 dia. E mayor problema pa Aruba t’e awasero intenso, no e biento, ya cu historicamente 8 di cada 10 victima di horcan ta causa pa inundacion.
Gobierno y autoridad a prepara plan di respons p’e temporada di horcan, trahando hunto cu Hulanda y e otro entidadnan. Ora cu un sistema yega Barbados, ta activa un alerta aproximadamente 120 ora prome, cuminsando un proceso legal pa emiti alerta na Aruba. E comunidad lo wordo informa por lo menos 48 ora prome cu e sistema afecta e isla.
Na 2024, lo purba evita panico den comunidad riba e imagennan satelital di mancha cora riba Internet, ya cu esaki solamente ta indicado preliminar. E responsabilidad di informa ta cay bek riba Meteo, cu ta coordina cu CMO pa emiti e alertanan.
Recomendacion pa comunidad
Esunnan cu tin dak cu ta lek, mester wordo revisa prome cu e temporada di awasero intenso. E personanan cu ta biba den propenso na inundacion mester ta prepara p’e posibel molesternan. Den e caso di mal tempo, lo anuncia ceramento di scol y otro medida necesario a traves di prensa di ARuba, cu t sigui ta un socio crucial pa informa comunidad.
Nomber di e tormentanan p’e aña aki den Atlantico y Caribe: Alberto, Beryl, Chris, Debby, Ernesto, Francine, Gordon, Helene, Isaac, Kirk, Leslie, Milton, Nadine, Oscar, Patty, Rafael, Sara, Tony, Valerie, William.
Comunidad mester mantene su mes informa y prepara, ya spera cu e temporada di horcan aki ta un di esunnan mas activo di e ultimo añanan.
