“Mi a caba di sali for di un tremendo reunion cu Sectretario di Estado sr Blokhuis. Hulanda a garantiza cu full Aruba ta haya e vacuna di Pfizer so! Esaki ta loke Minister di Salubridad Dangui Oduber a anuncia.
Na mesun momento e mandatario a informa cu otro siman diaranson 14 april 2021 Aruba lo mester a haya conforme palabracion 11.700 vacuna. “Nos a haci peticion pa nos por haya mas vacuna y awe Hulanda a confirma cu otro siman diaranson nos ta bay haya 30.420 vacuna. Na un manera serio, responsabel y cu conviccion nos a convence Hulanda pa manda mas vacuna pa nos.”
segun e ultimo datonan, tin casi 23 mil persona vacuna caba, tin un poco mas cu 40 mil persona registra mientras cu a aplica mas cu 33 mil vacuna caba.
“Aruba, ban sigui vacuna, ban sigui registra pa nos por scapa mas bida, reduci hospitalisacion y pa nos por progresa,” ta e mensahe cu e mandatario a manda.