NEW YORK CITY, New York – Merca a nombra 21 pais Caribense entre un lista mas amplio global di paisnan cu ta laba placa pa 2016. E Departamento di Estado Mericano a saca e siman aki un lista di e paisnan den su Narcotics Control Strategy Report riba Labamento di Placa y crimennan financiero. Entre e paisnan riba e lista aki, Aruba y hasta Corsou ta figura entre nan. E otro paisnan ta Antigua y Barbuda, Bahamas, Barbados, Belize, British Virgin Islands, Cayman Island, Cuba, Dominica, Republica Dominicana, Grenada, Guyana, Haiti, Jamaica, St. Maarten, St. Kits & Navis, St. Lucia, St. Vincent & Grenadines, Surinam y Trinidad & Tobago.
Pakico Aruba y Corsou ta envolvi
Departamento di Estado Mericano ta bisa cu Aruba ta un punto di transshipment pa droga for di Sur America, direccion Merca y Europa y pa e placa circula den e direccion opuesto. Contrabanda di placa ta representa un riesgo debi na e ubicacion di Aruba entre Nort y Sur America. Labamento di Placa, di acuerdo cu e rapport, ta primeramente relaciona for di procedencia ilegal di trafico di droga door di organisacionnan criminal y ta sosode atrabes di compranan di real estate y refugionan fiscal internacional. No tin un mercado negro significante pa articulonan contrabandea riba Aruba.
Pa loke ta Corsou, Merca ta denuncia labamento di placa riba e isla aki, ta primeramente relaciona cu ta procede for di droga ilegal. E rapport di Departamento di Estado ta laba placa pa organisacionnan cu ta tuma bentaha riba e disponibilidad di dollar Mericano, offshore banking y sistemanan incorpora, e labamento atrabes di compranan di real estate, refugionan fiscal internacional, wire transfer y transporte di efectivo entre Corsou, Hulanda y e otro islanan di Caribe Hulandes.
E informacion aki cu a keda publica riba http://www.newsamericasnow.com y sigur riba medionan social, hopi hende akinan na Aruba a lesa e raportahe aki. Manera cu nos por a saca afo, hendenan ta hayando hopi duda den e economia y finansas aki na Aruba y ta cuestiona, si cos ta asina bon, dicon nos ta figura riba un lista cu 21 pais cu ta laba placa. E trabao awor ta keda na Gobierno pa saca nos pais for di un situacion asina aki, cu Aruba ta para fuerte pa loke ta su sistema fiscal y no ta bira un paraiso pa organisacionnan criminal bin deposita nan placa gana na un mal manera y pone nos riba un spot negativo internacional.
Fuente: www.newsamericasnow.com