Ta cu hopi satisfaccion, e mandatario encarga cu Asunto Social y Labor a duna inicio oficial na e prome Dialogo Tripartiet Social Laboral den historia di Pais Aruba di e indole aki.
Un dialogo cu ta consisti di representantenan di Gremio Sindical (e trahado), Gremio Comercial (e dunado di trabou) y Gobierno di Aruba. Kico ta haci e DTSL aki historico? Cu ta pa prome biaha cu e gremionan ta haya derecho di bos den un Dialogo. Ta pa prome biaha cu e dialogo ta conta cu apoyo y input di tur gremio. Ta pa prome biaha cu gremionan y gobierno hunto ta determina puntonan di prioridad. Un dialogo tripartiet conforme exigencia y reglanan di ILO – International Labor Organization. Pues un dialogo cu participacion real y no un ‘dialogo’ unilateral di informacion.
E mandatario ta sumamente orguyoso di e logro aki y ta gradici e team tecnico cu a traha 9 luna largo riba e prome congreso DTSL aki. Ta e mandatario su conviccion cu ta den dialogo, den esfuerso y entendimento conhunto, cu por logra bienestar cu pasonan firme pa tur partner y stakeholder. Logronan cu ta carga e consensus cu ta aceptabel y cargabel pa tur.
E mandatario ta gradici un y tur cu tabata presente, un y tur cu a duna su contribucion participativo durante e Dialogo. E fe y optimismo di Minister Glenbert Croes ta grandi, cu hunto lo logra e miho pa nos Pueblo y nos Pais.