E dia di “Derecho di bida prome cu nacemento ”, ta ser conmemora tur aña dia 25 Maart. Esaki ta un dia pa reflexiona riba e importancia di bida for di momento di concepcion. Diadomingo awor 26 Maart 2017, Aruba ta celebra e proteccion di bida for di momento di concepcion den nos gran caminata “Bida humano ta un regalo, proteh’e”. Sea atento cu e proteccion pa bida ta ser ataca hopi den ultimo añanan cu argumentonan cu ta bai contra di e derecho di e ser humano cu tin bida for di momento di concepcion. Nos, como sernan bibo, ta carga un responsabilidad importante pa ta bon informa y tuma accion pa defende bida di tur ser humano sin excepcion. Bo participacion na caminata ta un acto di amor pa defende derecho , salud y dignidad di un ser femenino cu tin e oportunidad pa trece un bida nobo na mundo. Bo ta apoya e grupo masculino cu ta para firme pa defende bida di su yiu. Tambe bo ta defende bida den su fase inicial. Ta depende di nos pa Aruba sea un pais na unda Bida Humano ta ser proteh’i for di concepcion .Uni bo mes na e gran causa aki. Scolnan, grupo di famia, instancianan social, gruponan apostolico,parokianan, asociacionnan deportivo, gruponan di baile, arte, bandanan musical, coleganan di trabou, grupo di amistad, e mamanan na estado, hobennan, muchanan y cada ciudadano di Aruba bin cana na defensa di Bida. Pa tur persona cu pa un of otro motibo no por cana, por apoya e participantenan riba ruta di caminata cu ta sali for di Wilhelmina Park y sigui riba Linear Park. Na tur persona cu a participa aña pasa, invita un persona mas pa bin cu bo y haci Caminata “Bida humano ta un regalo, Proteh’e” un biaha mas uno yen di bida. Pa mas informacion por e-mail na [email protected] of yama 7330505/5948042. Tambe por bishita nos facebook page. Caminata ta start 5:00p.m. For di 4:00 p.m. por cuminsa registra. 4:45 p.m., SLIM DOWN DANCING cu lo percura pa warming up y prepara pa salida. Lo tin musica, bon ambiente y facepainting pa demostra e alegria cu bida ta trece cun’e. E aña aki tur fondo recauda ta destina pa un Proyecto cu ta sostene mayornan hoben pa sigui studia! Nos ta conta cu bo aporte. Comision Caminata Pro Bida Aruba ta yamabo danki pa uni!