Un di a cabaynan di campaña di partido RED y su lider, Sr. Ricardo Croes tabata e legalisacion di cannabis medicinal.
Sr. Croes nunca a sconde cu e ta pro cannabis, pro legalisacion di cannabis. Cada biaha e tabata admiti cu e ta un usuado di cannabis. Pero despues di eleccion, camidna cu Sr. Croes a bay parlamento y Sr. Rudy Lampe a bira minister, den e caso aki di Enseñansa. Henter e caso di legalisacion di cannabis medicinal parce di a pasa pa olvido. Of al menos, a pone den un lachi, pa cualkier dia cu corda ariba dje, bin cun’e bek. Awel, ta parce cu e dia a yega.
Nos por a tuma nota cu riba e pagina di Facebook di Sr. Rudy Lampe, por lesa cu e tabata na un conferencia na Panama y cu Panama e siman aki ainda, lo aproba e uzo di cannabis medicinal. El a sigui bisa cu St. Vincent tambe lo bay over na aprobacion di uzo cannabis medicinal.
Pa nos sorpresa por a mira cu Sr. Lampe ta bisa, cu Aruba a bisa duidelijk cu Aruba lo ta e siguiente pais pa aproba e uzo di cannabis medicinal, cual ta loke Sr. Ricardo Croes y RED a bay campaña cun’e. Pregunta ta: con leu e ley aki di cannabis ta y si el a yega Parlamento caba.
Nos lo keda pendiente di cualkier desaroyo ariba e tema aki..