Aruba ta uni na e celebracion mundial di Dia Mundial di Parha Migratorio (World Migratory Bird Day-WMBD) riba diasabra, 10 di mei 2025, cu un enfoke special riba e tema di e aña aki: “Espacio Comparti: Creando Ciudad y Comunidadnan amical pa Parha.”
E campaña aki ta busca pa comparti y eleva consciencia di e importancia di integra e necesidadnan di parhanan migratorio den nos planificacion y desaroyo urbano y comunitario. Directie Natuur en Milieu (DNM) 2 bes pa aña ta trece e topico dilanti di parhanan migratorio como cu Aruba tambe ta ubica riba e ruta cu e parhanan ta bula den e periodo di migracion.
E tema di 2025 ta un reconocemento cu tanto hende como parha ta comparti e mesun espacio riba nos planeta. Cu un aumento den populacion humano y expansion di areanan urbano, ta bira cada bes mas importante pa crea ciudadnan y comunidadnan cu ta tene cuenta cu e bienestar di e parhanan cu ta bishita nos temporalmente of esun cu ta biba aki. Esaki ta encera preserva areanan berde, reduci polucion, y minimalisa e impaco cu construccion tin riba nan habitat natural.
Aruba ta un punto importante riba e ruta di migracion di diferente especie di parha. Nos ta specialmente honra di ricibi bishita di parhanan impresionante. Algun di e parhanan cu e campaña di 2025 di WMBD a uza den nan diseño cu sa bishita Aruba ta: Falco Peregrino (Falco peregrinus); un parha jaagdo poderoso cu ta pasa cerca nos durante su biahe largo, American Redstart (Setophaga ruticilla); un parha chikito cu color vibrante cu ta busca refugio y alimento y e Red Knot (Calidris canutus); un parha di tamaño mediano color cora cu ta bula miles di kilometer. E presencia di e parhanan aki ta un recordatorio di e interconexion di ecosistemanan y e responsabilidad cu nos tin pa proteha nan durante nan estadia aki.
Creando ciudadnan y comunidadnan amical cu parha na Aruba ta nifica implementa accionnan concreto y tambe adopta miho practicanan. Aki ta sigui algun sugerencia:
Mantene y crea mas area berde: Parkenan, hardinnan, y otro espacionan natural den areanan urbano ta provee habitat y fuente di alimentacion pa parhanan.
Uza diseño di iluminacion cu ta tene cuenta cu parhanan/bestia: Luz artificial por desorienta parhanan migratorio. Un bon plan di iluminacion ta minimalisa e efecto negativo aki. Por haya e SOP ‘milieu vriendelijke verlichting’ riba nos website dnmaruba.org
Promove plantamento di matanan local: Matanan local ta ofrece e miho fuente di alimento y habitat pa e parhanan local y esun migratorio.
Controla e uzo di pesticida y herbicida: Kimiconan por ta dañino pa parhanan y nan fuente di alimentacion.
Conscientisa comunidad: Educacion publico riba e importancia di parhanan migratorio y con nos por yuda nan ta crucial. Comparti e recursonan cu nos ta publica riba rednan social pa cu e dia observa aki uzando hashtagnan #sharedspaces #WMBD2025 #worldmigratorybirdday
Implementa regulacion di construccion: Sigura cu desaroyonan nobo ta tene cuenta cu areanan importante pa parhanan. Den diseño arkitectura evita glasnan grandi cu ta confundi parhanan. Parhanan ta bula y dal contra esakinan y muri.
Tene bo mascota (pushi) paden: nan ta predado pa parhanan.
Durante e dianan venidero DNM ta publica hopi recurso den cuadro di celebracion di Dia Mundial di Parhanan Migratorio 2025. Cooperacion y colaboracion semper ta yega mas leu, DNM ta gradici organisaion manera Aruba Birdlife Conservacion pa semper ta atento cu nos parhanan local y esunnan migratorio. Nos ta invita tur hende, negoshi, scol, y organisacionnan pa participa activamente y asina contribui na un ambiente mas amical cu nos parhanan migratorio. Hunto nos por sigura cu Aruba ta un bon luga pa biba, tanto pa hende como pa e diversidad di parhanan cu ta bishita nos isla. Nos tur tin un ro pa hunga pa sostene e parhanan migratorio! Feliz dia mundial di Parhanan migratorio.
- Latest
