Despues cu diamars Aruba a keda paralisa pa e caso di crimen caminda cu un persona a perde su bida pa motibo di un atraco, a bin un avalancha di comentario di ciudadanonan hopi disgusta riba Facebook, trahando avisonan, expresando nan rabia y desapunto pa loke ta trata criminalidad riba su mes y tambe riba e caso lamentabel cu a sacudi Aruba por completo. Hopi di e usuarionan di e medio social aki, a mustra, atrabes di e avisonan aki, algo mester wordo haci, pa asina nos por tin e paz y trankilidad cu semper nos tabata tin. Esaki sigur, segun algun di e usuarionan, nunca mas tipo di cosnan aki no mester bolbe pasa nunca mas na Aruba.
Nos no ta haya solamente usuarionan, pero di parti di politiconan tambe nan a expresa un desapunto completo y ta hasta punta dede cu nada no ta wordo haci. Awor aki, tin cu sinta cabes friu y hunto cu nos cuerpo policial, y naturalmente Gobierno, traha un plan di atake pa asina gara e toro na su cacho y rabo, pa stop e fenomeno aki, cu aparentemente a cuminsa bira un “way of life” di hopi di esnan cu ta kere cu ta haya ta bon pa bira doño di cosnan cu nan no ta merece, na un manera facil y yega asina leu di kita bida di un persona inocente. Masnoticia.com lo sigui e desaroyonan aki di cerca.