Den luna di april, durante e ‘SITE Global Conference 2022’ na Dublin, Irlanda, Aruba su nomber a resalta ora cu e compania HMI Performance Incentives a gana un ‘Crystal Award’ pa un projecto social cu nan a haci na Aruba. HMI Performance Incentives a organisa pa nan cliente Manning Building Supplies haci un donacion na Fundacion Pa Nos Comunidad (FPNC) durante di nan bishita como grupo incentivo na Aruba, aña pasa. Di e forma aki a provee 40 famia na Aruba cu productonan di cuminda y higiena pa un luna. Durante e bishita, participantenan tawata tin e oportunidad di paketa e productonan na hotel pa despues esakinan wordo entrega na FPNC. Varios di e 300 participantenan di e biahe a comparti cu nan a sinti un conexion special cu e projecto durante nan estadia. E esfuerso di tur cu a contribui na e projecto aki, pero tambe e impacto positivo pa Aruba cu e grupo di biahe a haci, a pone cu a gana e premio prestigioso aki den e industria di biahenan di incentivo. Aruba su nomber a resalta durante e premiacion dilanti mas di 500 profesional den e industria. Aruba Convention Bureau ta hopi orguyoso di e logro aki, ya cu e ta mustra cu como destino pa gruponan incentivo, Aruba ta ofrece diferente oportunidad pa participantenan, manera experiencianan bunita di responsabilidad social corporativo. Aruba Convention Bureau ta kere cu incorporando iniciativanan social mane esaki ta trece beneficio pa e comunidad y tambe pa e compania y su empleadonan. Aruba Convention Bureau a crea un guia di responsabilidad social corporativo y ta promove esaki cu e meta pa crea oportunidadnan entre gruponan incentivo y organisacionnan na Aruba. Aruba Convention Bureau kier gradici socionan local cu a contribui pa por a hasi esaki posibel. Pabien na Fundacion Pa Nos Comunidad y alabes Hyatt Regency Resort y De Palm Tours DMC, cu e logro aki!
- Latest
