Aruba Student Living ta uni forsa pa yuda studiantenan Caribense na Hulanda

Ultimamente un raport di Nationale Ombudsman a bolbe saca na cla cu lastimamente hopi studiante ta topa hopi obstaculo ora nan yega Hulanda. Un par di siman prome un raport di Levende Talen Papiaments tambe a enfatisa cu mester bin cu solucion pa e obstaculonan linguistico, social y emocional cu e studiantenan ta enfrenta. E preparacion na e islanan pa locual ta trata asuntunan practico y adaptacion academico por mihor.

Virtual Youth Support (VYS) a inicia su actividad na februari 2020 na Hulanda. E mision di Virtual Youth Support ta pa prepara e futuro studiante bon prome e cuminsa su bida di studiante na Hulanda y guia e studiante na Hulanda tambe di tal forma, cu e ta motiva pa cuminsa y termina su estudio exitosamente. Virtual Youth Support ta guia e studiante den asuntonan practico pero tambe cu su estudio. E aña aki Virtual Youth Support a guia basta studiante exitosamente. Na augustus 2020 VYS a habri su filial na Riffort Village Renaissance na Curaçao. E organisacion ta ofrece diferente curso relevante cu ta prepara e futuro studiante.

Aruba Student Living mescos cu Virtual Youth Support ta prepara studiantenan cu tin pensa di bay studia na Hulanda. E preparacion na Aruba ta centra riba adaptacion social, e uzo di Hulandes y tambe maneho di placa. Aruba Student Living tambe ta traha prome cu cu nan bay studia dunando e studiante diferente curso y guia individual. Aruba Student Living su enfoke ta riba studiantenan cu lo sigui un estudio riba e nivel di MBO.

E asociacion Levende Talen Papiaments a start na januari 2020 cu e proyecto piloto Studiamigu. Como parti di e proyecto studiantenan biba na Hulanda ta haña guia academico pa loke ta trata principalmente e idioma Hulandes. Banda di esaki e studiantenan ta bin den contacto cu diferente guia cu tambe a bini Hulanda como studiante, a termina nan estudio exitosamente y awor tin un carera profecional exitoso. E guianan ta yuda e studiantenan cu nan tareanan pa nan estudio y na mes momento ta yuda nan adapta na e contexto academico. Na januari 2021 e proyecto piloto Studiamigu lo drenta su di dos fase prome e keda lansa pa un grupo grandi di studiante na september 2021.

E union di e tres organisacionnan ta basa riba consulta, yudansa mutuo y intercambio di experencia pa garantisa cu e studiante ta bon prepara y guia riba diferente tereno di su bida como studiante. Tur tres organisacion su meta ta pa motiva e studiante pa termina su estudio exitosamente. E organisacionnan ta funciona individualmente riba nan mes tereno di experticio pero ta traha hunto den e sentido cu nan ta referi studiantenan na otro pa guia. Asina Aruba Student Living ta pasa su studiantenan pa Virtual Youth Support ora nan yega Hulanda y Virtual Youth Support ta pasa su studiantenan pa Levende Talen Papiaments pa traha riba e parti academico y miembronan di Levende Talen Papiaments y studiantenan di Aruba Student Living ta haña e cursonan di Virtual Youth Support na un prijs hopi faborabel.

Miraila Bernadina-Theodora (Virtual Youth Support), Vanessa Tromp-Baloche (Aruba Student Living) y Nihayra Leona (Levende Talen Papiaments) ta mustra cu e union aki cu nan ta para cla pa beneficia e studiante Caribense cu kier studia na Hulanda.

Pa mas informacion tocante di e comunicado di prensa aki por tuma contacto ku Miraila Bernadina-Theodora (+31 630170820/[email protected]), Vanessa Tromp-Baloche (+2975644124/[email protected])of Nihayra Leona (+31 625690523/[email protected]

Comments

comments