Aruba Sport Unie a wordo funda dia 21 di December, 1941. E aña aki 21 di December, e ta cumpli 75 aña y tin cu corda riba e fundadornan. Segun e presidente actual Gerald Franca, e aña aki lo ta uno special den cuadro di e celebracion aki. Tambe el a splica kico tur nan tin pensa di haci pa loke ta e celebracion den 2017.
Franca a splica cu e prome presidente tabata Coco Arends, kende ta e mesun persona cu a cuminsa tambe, kende ta fundador di Arubaanse Voetbal Bond 5 pa 6 aña prome. Un di e organisacionnan cu a yuda lanta Aruba Sport Unie tabata RCA, Club Caribe y Tivoli, cual ta e prome organisacionnan cu a lanta e asociacion aki.
Na 1949 pa prome biaha den historia, ASU a cuminsa haya e subsidio di Gobierno Central pa facilita tambe e federacionnan di e tempo ey cu placa pa nan organisa actividadnan. Despues di e periodo ey tabata haya Lago ta yuda hopi den parti di formacion di e clubnan y nan tabata subsidia of duna donacion na e diferente clubnan pa nan material, etc. durante aña. Difunto Mateo Reyes, kende ta un persona conoci y keri, tabata encarga cu esaki. E ta un di e personanan cu a yuda ASU pa haya Joe Laveist for di Lago como un centro pa deporte. Lago Sportpark tabata di Lago y a bin pa pase pa Joe Laveist, pa pas’e pa ASU.
Franca a menciona cu durante aña, durante 1955, ASU a celebra su prome ASU Olimpiada y despues di esey a keda celebr’e. Hopi di e atletanan grandi ta recorda e fechanan ey, caminda cu nan a wordo eligi como atleta di aña den decadanan di 60, 70 y 80. ASU semper a maneha deporte pa Gobierno y hasta a bay asina leu cu ASU a manda hende den exterior cu studie opdracht, pa bin bek lanta scol di deporte pa Aruba. Esaki nunca a logra debi na cosnan cu tabata pasa internamente. Despues ASU tabata encarga pa duna subsidio te cu na aña 1997, caminda cu Gobierno a tuma e tarea aki bek den su seno.
Franca a sigui splica cu na e momentonan aki tin un comision cu ta trahando riba dje pa pasa e fecha pa Januari. Pa fin di aña ta imposibel pa organisa algo. Idea ta pa haci algo riba dje pa recorda e fecha y recorda esnan cu a funda e organisacion aki. Tabata tin hasta hendenan conoci entre otro shon A. Eman cu tabata un di e prome personanan den e directiva. Tin hopi hende conoci den comunidad tabata forma parti di ASU di e tempo ey.