Cu hopi duele y dolor na nos curason Aruba Softball Bond lo mester bisa ayo te despues na un ser hopi keri kende semper a traha pa softball boluntariamente sin importa nada a cambio. Chin Thiel recientemente riba su fecha natal 17 di Augustus ultimo cumpliendo su di 70 aniversario a wordo homenagia y reconoci pa Aruba Softball Bond cu e campeonato oficial 2018 dedica na su honor.
Chin sinembargo tabata den hospital pero nunca nos por a biba pensa cu algun dia despues Chin lo bay laga nos. Tanto Endy Croes Presidente di Aruba Softball Bond y Chipen Chirino vice presidente di ASB a bishita Chin Thiel un dia prome cu el a bay laga nos. Chin, un cuidadano di Warawara hopi keri kende desde hoben a practica deporte y despues a bira dirigente. Desde 1979 Hyacintho Chin Thiel a drenta bestuur di Aruba Softball Bond y a traha incansablemente te cu awor. Chin un homber humilde di Sta Cruz cu un caracter noble semper cla pa yuda. Recordando Chin Thiel durante diferente reunion semper e ta skerpi y ta para pa locual e ta kere aden. Chin a representa Aruba como miembro di Directiva y Hefe di Delegacion pa hopi aña largo na diferente pais rond mundo.
Un di e ultimo potretnan cu nos a logra compila ta Chin hunto cu seleccion masculino na Bogota, Colombia na aña 2015 unda seleccion a logra un medaya di BRONZE den campeonato di CONSURSA. Nos por recorda e alegria cu a brota for di curason di Chin Thiel momento cu Aruba a derota Panama pa conkista dicho medaya.
Ta momentonan inolvidabel y nunca nos a biba pensa cu esey lo tabata Chin Thiel su ultimo biahe cu un seleccion di Aruba como dirigente hunto cu su amigo di añas, Chipen Chirino y Endy Croes. Directiva di Aruba Softball Bond Endy Croes, Francisco Chipen Chirino, Andresito Krozendijk, Roy Geerman, Estefano Croes, Pierre Croes, Franklin Odor hunto cu tur miembro di diferente Comisionnan y sigur tur nos clubnan miembro y nan atletanan ta yama Chin ayo y sosega na Paz. Na su esposa Maria Thiel Croes y su unico yui Eduardo Thiel alabes tur rumannan y familiares demas amigonan amistadnan y conocirnan Aruba Softball Bond kier expresa palabranan di hopi forsa cu e perdida grandi aki y cu Papa Dios brinda boso e fortalesa nesesario den dianan nos dilanti. Aruba Softball Bond ta invita tur su miembronan pa acudi na entiero di Chin Thiel diaranson awor 29 di Augustus di 2 pa 4pm na misa di Sta Cruz. Aruba a perde un baluarte. Aruba a perde un “STREA” cual lo briya desde awor den shelo. Amigo Sosega na Paz!