Campeonato HEINEKEN di Aruba Softball Bond ta inicia diabierna awor. Aruba Softball Bond lo dedica e campeonato 2018 na dos baluarte esta Wilbert “Wiwi” Maduro y Hyacintho “ Chin” Thiel. Cuminsamento di siman ASB a publica e biografia di Wiwi Maduro y awe lo dedica e edicion aki na e biografia di Chin Thiel. Hyacintho Paulo Juliano “ Chin” Thiel nasi 17 di Augustus 1948, pues riba dia cu e campeonato 2018 ta inicia cual ta wordo dedica na su persona. Chin Thiel ta felizmente casa cu Maria Thiel Croes. Di e matrimonio aki nan tin nan unico yiu Eduardo Thiel mihor conoci como Eddy. Chin ta bin di un famia grandi di un total di 13 ruman. Chin Thiel un ciudadano hopi keri den bario di Warawara Sta Cruz a cuminsa practica e deporte di baseball y softball na un edad hopi hoben. Despues Chin a bira manager di diferente ekipo y alabes a traha den Directiva di ASB pa hopi aña. Chin a hunga baseball Santa Cruz den A Klas, y despues pa J&B Sta Cruz Stars AA. Chin a milita tambe den SV Velocidad y Astros. Mas despues Chin a bira coach di un famoso ekipo di baseball Kentucky di Sta Cruz den A-Klas cual ekipo a promove pa AA. Al mismo momento Chin tabata hopi activo den softball unda Chin a hunga pa Red Star, despues pa Los Leones y mas dilanti pa Chuchubi un ekipo cu Jo Thiel (q.e.p,d) a lanta. Jo Thiel (q.e.p.d) y su esposa Chaba Thiel ta mayornan di tur e rumannan Thiel hopi popular den pueblo kendenan a hunga baseball y softball riba un nivel di mas halto. E ekipo di Chuchubi despues ta cambia di nomber y ta bira Honda y akinan Chin ta tuma e timon over como manager di Honda. E ekipo di Honda ta transforma su mes den Aruba Video Center y Chin Thiel ta pasa di Coach pa miembro di directiva.
Hyacintho “Chin” Thiel como miembro di directiva boluntario di Aruba Softball Bond
Chin Thiel desde aña 1979 a wordo eligi como miembro di directiva di Aruba Softball Bond y a traha mas di 35 aña boluntario pa e deporte di softball. Na 1997 a bin cambio den directiva mientrastanto Chin Thiel a join Comision Pro Softball Organisa na aña 2004 pa asina sigui traha y rescata softball cu a cay den un gap desde 1999 pa 2003. Chin a forma parti di directiva di Comision Pro Softball Organisa desde 2004 pa 2010. Chin Thiel trahando incansabel aña aden y aña afo na 2010 a bolbe keda eligi como miembro di directiva di Aruba Softball Bond y ta continua cu su pasion y trabounan boluntario. Na final di 2017 Chin Thiel ta wordo nombra miembro di honor di Aruba Softball Bond. Chin na multiple ocasion a biaha cu seleccion como Delegatie Leider entre otro 1986 Valencia Seleccion Femenino, 1987 Corsou Seleccion Femenino, na aña 2000 Puerto Rico y recientemente Colombia na varios ocasion. Chin a traha tambe como miembro di directiva durante weganan di Reino Juli 1995. Chin Thiel mientrastanto ta sufriendo un kebrante di salud pero ohala cu Fe den Señor pronto nos lo por mira Chin Thiel bek na tereno. Merecidamente Aruba Softball Bond ta reconoce Chin Thiel como un baluarte di e deporte di softball y ta dedica campeonato 2018 na su persona. Pabien Hyacintho “Chin” Thiel y danki pa tur Bo trabounan cu Bo a eherce reconociendo Bo amor incondicional y Bo dedicacion y pasion cu Bo a demostra pa deportenan di Softball y Baseball. Danki, Masha Masha Danki!!!!